Nadal asegura que’l PP usará la mayoría si los axentes sociales “nun son razonables” cola reforma llaboral

|

Álvaro Nadal, secretariu d’Economía y Emplegu del PP, avisó que la so formación usará la mayoría absoluta si los axentes sociales “nun son razonables” cola reforma llaboral. “El mercáu llaboral español ye’l que peor funciona del mundu”, afirmó.
 
Pal popular, el presidente del Gobiernu estatal próximu, Mariano Rajoy, “tien un mandatu de los ciudadanos” pa “facer lo que tenga que facer” en materia de reforma llaboral “si otros axentes sociales nun son razonables”. Nadal espresóse d'esta manera en declaraciones a Telemadrid a entrugues sobre la rellación que l‘Executivu nuevu va caltener colos axentes sociales, sobre manera los sindicatos, de cara a tratar nuevos cambios nel mercáu de trabayu.
 
Tres recordar que Rajoy aprovechó'l so discursu, acabante conocer el resultáu de les eleiciones, p'anunciar que va abrir el diálogu social pidiendo la collaboración de "tol mundu", y asegurar que'l PP espera "razonabilidá y sensatez perriba de too", Nadal remarcó que'l procesu "nun pue eternizase". "Hai que facer una reforma llaboral porque'l mercáu de trabayu español ye'l que peor funciona del mundu; namái hai que ver los resultaos", incidió'l númberu dos del equipu económicu del PP.
 
Coles mesmes, Nadal remarcó que'l PP tien que suprimir les "subvenciones nominatives" recoyíes nos Presupuestos Xenerales del Estáu pa sindicatos y otres organizaciones sociales, partíos políticos incluyíos. "Les subvenciones nominatives, con nomes y apellíos, tendríen de suprimise; si se da una subvención a dalguien tendría que ser un concursu abiertu a tol mundu. Per esa llinia hai qu'axustales", señaló.
 
Apretar el cintu
 
Nadal tamién apuntó que nun se debe confundir los "recortes" cola "xestión" del gastu públicu, como, al so xuiciu, ta faciéndose en Catalunya y Castilla-La Mancha, porque ye ineludible "apretar el cintu" y aseguró que'l PP va facer tolo posible por caltener les "partíes necesaries", como la sanidá o la educación. Sicasí, afirmó que'l PP va caltener ensin reducción les partíes destinaes al cumplimientu de la Llei de Dependencia "na midida na que sía encaxable", pero que les previsiones de desarrollu nun son prauticables. "España tendría que ser muncho más rica pa poder permitíselo”, remarcó.
 
En too casu, negó que'l PP tenga un programa 'ocultu' y recordó que l'axuste de gastu ye dalgo que se pactó col PSOE a partir de la reforma constitucional pa recoyer el principiu d'estabilidá presupuestaria qu'agora va haber que "desarrollar y cumplir", ensin qu'ello conlleve una xuba d'impuestos. "Los ciudadanos nun tán pa eso", aseguró.

Contador Estadistiques