Naciu Varillas llévanos per una "carretera ensin barru"

El compañeru de llabores informativos dende los micrófonos de Radio Llangréu Naciu Varillas presenta esti miércoles a les 7 en Casa la Cultura de La Felguera la so primer novela "Carretera ensin barru". Espublizada por Trabe dientro de la so colección "Incla interior" la obra espeya la busca del so raigón familiar y la so identidá nel imaxinariu pueblu de Les Ablanales por parte d'Ana, una moza que ye la última representante de la so saga familiar.

Lo mesmo que'l so güelu fixere nel so día la emigración en barcu a les amériques, Ana ye una representante de la emigración asturiana d'anguaño que se desplaza pendularmente nel ALSA ente Asturies y Madrid. Desnortiada pola so falta de referentes nun pueblu nel que nun dexa de ser estraña, Ana llega amás al llugar au entamare la so familia nun momentu en que la historia de Les Ablanales ta pa dar un reblagu que pue dexar el pueblu irreconocible cola construcción d'una carretera y d'un gran centru comercial y d'ociu. La trama d'intereses personales que se desaten cola llegada de los especuladores va enguedeyándose col texíu de rellaciones personales qu'Ana va creándose nel so retornu a Les Ablanales hasta llegar a un final alloriante y sorprendente, too ello contao con un estilu sueltu, directu y prestosu nel que les descripciones de situaciones y personaxes, amás de precises, resulten perfectamente reconocibles y actuales pa cualquier llector. Pente medies del rellatu principal, Varillas inxerta dellos cuentos curtios que sirven p'acutar paréntesis na narración y que-y valen d'antoxana al tema central que va tratase nos capítulos que vienen darréu de cada rellatu.


Naciu Varillas presenta "Carretera ensin barru" esti miércoles 21 d'avientu na Casa de Cultura de La Felguera . Ello va ser a les 7 de la tarde .