Nacho Vegas vende a los sos hermanos pequeños

A la espera de la llegada del so próximu álbum d'estudiu, Limbo Starr saca al mercáu un box set nel que se recuperen los seis EP's publicaos hasta'l momentu por Nacho Vegas.

Tres la decisión del xixonés Nacho Vegas de poner en marcha al pie de I'm an Artist y otros artistes el sellu Marxophone col fin de llanzase a la autoedición, Limbo Starr, discográfica cola qu'editó tolos sos trabayos hasta'l momentu, paez rindi-y un homenaxe de despidida.
  
La marcha de Nacho Vegas de Limbo Starr xeneró munchos rumores sobre la salú  de la so relación, algo qu'ambes partes apresúrense n'esclarar con un comunicáu nel que sorrayaron que se producía "de mutuu acuerdu" y sin nengún tipu d'enemistá, más bien tolo contrario.
  
Naquel comunicáu yá s'adelantaba'l próximu llanzamientu d'un box set y una reedición que va ser bien celebrada polos sos siguidores, especialmente a la espera de que'l próximu mes de febreru salga a la venta'l nuevu álbum d'estudiu de Nacho Vegas.
  
Per un sitiu edítase 'Los hermanos pequenos', un box set nel que se reúnen los seis EP's publicaos por Nacho Vegas hasta'l 2009, un formatu que l'asturianu aprecia y que siempre punxo en valor en paralelo a los LP's.
 
Trenta canciones
'Los hermanos pequeños' inclúi 'Seis canciones desde el norte', 'Miedo al zumbido de los mosquitos', 'Canciones desde palacio', 'El hombre que casi conoció a Michi Panero', 'Esto nun es una salida' y 'El género bobo'. Trenta canciones acompañaes por un llibretu coles sos lletres.
  
Amás, Limbo Starr reedita 'Cajas de música difíciles de parar', tanto en formatu doble CD como en triple vinilu, el segundu álbum del asturianu y ún de los sos discos más celebraos xunto con 'Actos inexplicables'.