Nacho Fonseca gana’l XIV Concursu de Cuentos pola Oficialidá de Bimenes cola obra 'Lluis'

‘Lluis’, de Nacho Fonseca, foi la obra escoyida como ganadora del XIV Concursu de Cuentos pola Oficialidá. D’esta forma, el ‘alma’ de Xentiquina recibe otra bona noticia na selmana na que’l so proyeutu musical pa neños va vivir un homenaxe.
 
El fallu d’esta edición del Concursu de Cuentos pola Oficialidá diose a conocer ayeri nun de los actos que ta viviendo Bimenes estos díes por mor de la XV Fiesta de la Oficialidá de la Llingua Asturiana, que’l sábadu celebra’l so día grande. La Casa Cultura de Santuyano acoyó la presentación del llibru ‘Canigú lliterariu’ y una llectura de testos n’asturianos por autores de la Mancomunidá de la Sidra, pa depués dar a conocer les meyores obres participantes nel concursu. Nacho Fonseca llevóse’l primer premiu, dotáu con 800 euros, gracies a la obra ‘Lluis’. El segundu premiu, de 500 euros, foi pa Quique Faes Díaz, col cuentu ‘Tengo un plan’ y el terceru, de 350 euros, pa Pablo Rodríguez Alonso con ‘¿Qué coño bebe un zulú?’.
 
La entrega de premios va celebrase’l vienres, a les 19.30 hores, na Casa Cultura de Santuyano. Nel actu, Nacho Fonseca va facer una llectura pública de la obra ganadora, como ye vezu nesti concursu. D’esta forma, l’escritor y profesor va vivir una selmana especial y emotiva, yá que’l xueves va celebrase un homenaxe pola so xubilación y el so llabor al frente de Seliquín y Xentiquina nos más de 25 años de carrera d’estos grupos formaos polos neños de los colexos de Porrúa y Lieres, de manera respeutiva. L’actuación cabera de Xentiquina, xunto a la d’otros artistes como Esther Fonseca o Alfredo González, ente otros, va ser nel Auditoriu Príncipe Felipe d’Uviéu a partir de les 20 hores. L’homenaxe va continuar depués con una espicha nel Tierra Astur de Cualloto.
 
Otra manera, esta tarde continúen na Casa Cultura de Santuyano les actividaes de la XV Fiesta de la Oficialidá de la Llingua Asturiana cola proyeición de la versión doblada al asturianu de ‘Los viaxes de Gulliver’, llargumetraxe estauxunidense d’animación dirixíu polos hermanos Dave y Max Fleischer nel añu 1939. Nel actu, que va principiar a les 19.30 hores, va tar presente Illán Gonzali, responsable de Gonzali Producciones, que va esplicar cómo ye’l procesu pa doblar una película y los sos proyeutos futuros.