Nacho Fonseca espera qu’otres persones continúen con proyeutos asemeyaos a Xentiquina

Esti xueves va celebrase l'homenaxe a Nacho Fonseca y a los sos 25 años al frente de Seliquín y Xentiquina. El profesor, cerca de xubilase, dexa’l so proyeutu musical pa neños pero espera qu’otres persones entamen otros asemeyaos.
 
En declaraciones a Europa Press, el fundador del coru señaló que “Xentiquina tien vitalidá, pero ye’l momentu de dexalo”. Entrugáu pola posibilidá de que dalguién tome’l relevu, esplicó que “esto ta vinculao al colexu de Lieres –onde da clase y forma los grupos corales–. Equí va venir un compañeru a sustituyime y hai que da-y llibertá”, esplicó. Sicasí, mostró la so esperanza de que “apaeza otra cosa distinta, conceptos distintos, en Lieres o n'otra parte, tan prestosos o más qu'ésti. Ye'l momentu de mover ficha dientro del mundu de la música pa neños”, opinó.
 
Fonseca recordó que “esto nació con una idea de normalizar dende la escuela lo que yera l'usu del asturianu”. Sicasí, considera que los cantares de Xentiquina “llograron salir un poco de les aules, porque la mesma sociedá asturiana acuéyelo mui bien”. Asina, afirma'l creador del coru que, por cuenta de la so xubilación, estableció contautu con persones que formaron parte de les primeres formaciones del grupu, detalle que, confiesa, llenólu d'allegría. No que respeuta al conciertu homenaxe d’esta tarde nel Auditoriu Príncipe Felipe d’Uviéu, señaló que “toi encantáu de la vida”.
 
L’actu, que tien entrada llibre, ta previstu pa les 20 hores y nél, amás d’actuaciones musicales, ente elles la de Xentiquina, va presentase un documental sobre la trayeutoria de Fonseca al frente del coru de neños y neñes de Lieres y el so precursor en Porrúa, Seliquín, y un discu homenaxe nel que 23 bandes consolidaes de la escena asturiana versionen cantares de los dos grupos. Dalgunes d’elles, como Bueno, Art Decó, Alfredo González, Esther Fonseca, Hector Braga, Los Berrones, Skanda, GAME y Skama la Rede, van participar nel conciertu d’esta tarde.
 
El direutor de cine, productor y responsable d’Algamar, Pablo A. Quiroga, ye'l responsable d'esti proyeutu, amás del documental que repasa los 25 años de Seliquín y Xentiquina. Tres l’actu del Auditoriu, la folixa va continuar con una espicha nel Tierra Astur de Cualloto.