NaBai va proponer la oficialidá del eusquera en toa Navarra

El grupu parlamentariu de Nafarroa Bai va rexistrar una proposición de Llei Foral del Vascuence na que se deroga l'actual normativa y reconozse la oficialidá del eusquera en "tol territoriu de la Comunidá foral".

Coincidiendo col 24 aniversariu de l'aprobación de la Llei Foral, les parlamentaries de NaBai Maria Luisa Mangado, Nekane Pérez y Paula Kasares ofrecieron una rueda prensa pa presentar esta proposición cola qu'intenten "responder a les necesidaes de tola sociedá".
  
Mangado llamentó qu'a pesar de que "la situación social de la llingua vasca en Navarra cambió de forma evidente nos últimos años" y cada vez "somos munchos más euskaldunes", la Llei Foral del Vascuence "sigue siendo la mesma d'hai 24 años".
  
Por ello, preguntóse "cómo ye posible que cambiando tanto la situación actual de la llingua quiera caltenese una llei que nun respuende a la situación y necesidaes de la sociedá navarra" y destacó que, hasta agora, foi la mesma ciudadanía la que "fizo una apuesta constante a favor del eusquera, creando 'ikastoles', poniendo en marcha medios de comunicación llocales o abriendo 'euskaltegis'".
  
Por too esto, la parlamentaria nacionalista consideró "necesario" que la sociedá navarra cuente "con otra Llei del Vascuence", dao que, "cada vez somos más los 'euskaldunes' que residimos na Comunidá foral" y la zonificación "namás valió p'acortar los derechos y les garantíes de les persones".
  
Asina, na proposición de llei presentada por Nafarroa Bai, la coalición reclama la oficialidá del eusquera "en toa Navarra", de manera que'l "eusquera tenga'l mesmu estatus que tien el castellán" y se garantice "la igualdá ente tolos ciudadanos", destacó Mangado.

Característiques de la proposición
En concreto, según esplicó Nekane Pérez, la proposición de llei presentada por NaBai al Parlamentu ta dividida en trés títulos. Nel títulu preliminar, reconozse la oficialidá del eusquera en tol territoriu de la Comunidá foral, mientres que nel primer títulu recuéyense los derechos en materia llingüística de la ciudadanía y los deberes que tien de tener l'Alministración.
  
Pela so parte, el segundu títulu, espunxo la parlamentaria de NaBai, ta estructuráu en cinco capítulos onde se detalla cual tien que ser l'usu del eusquera nos "distintos ámbitos" y "l'impulsu" que se-y debe dar, por exemplu, "na enseñanza o nos medios de comunicación".
  
Tamién s'establez nesti títulu l'usu social del eusquera y l'alfabetización de persones adultes, amás de recoyer un apartáu onde se reclama al Gobiernu foral que "vele pola normalización del eusquera, teniendo en cuenta les normes d'euskaltzaindia".
  
A lo último, la proposición de llei presentada por NaBai ta compuesta por trés disposiciones añadíes y la derogatoria de l'actual Llei del Vascuence que "lleva 24 años coartando los derechos llingüísticos de la ciudadanía Navarra pola zonificación".