“Na llexislatura próxima hai qu’afrontar sí o sí la reforma del Estatutu”, asegura Barbón

El 8 de setiembre, Día d’Asturies, Adrián Barbón va confirmar la so decisión de presentase a la reeleición como presidente del país. Na intervención pa facer balance de los trés años nel cargu aseguró que “na llexislatura próxima hai qu’afrontar sí o sí la reforma del Estatutu”.

“Estos trés años como presidente aválenme pa saber onde tán les mayores dificultaes y onde hai que trabayar”, apuntó’l socialista, qu’ufrió a la población estabilidá de gobiernu, seguridá y esperiencia pa lo que falta de llexislatura. “Queden meses per delantre d’intensu trabayu, meses de fuerte impulsu progresista, social y tresformador d’Asturies. Un Gobiernu tresversal que represente los intereses de la mayoría social asturiana, d’homes y muyeres d’ideoloxíes mui diferentes”, prometió al tiempu que recordó la necesidá de sacar alantre los Presupuestos Xenerales, xera na que va poner el so enfotu.

Entrugáu por si cree que fracasara cola reforma del Estatutu y la oficialidá, rescampló que sí, “fracasamos, yo como presidente y asumo’l mio error, pero non sólo en rellación a la oficialidá, sinón por dalgo muncho más intenso. L’Estatutu yera necesario reformalu porque n’otres comunidaes hebo lo que se llamen estatutos de segunda xeneración; equí non, equí nunca s’afrontó esa reforma”. Citó l’exemplu de la figura del decretu llei y afirmó que “sí, creo que na llexislatura próxima hai qu’afrontar sí o sí la reforma del Estatutu d’Autonomía”.

Defensa de los intereses del país

Barbón vien dende’l 2020, primer añu de la pandemia, faciendo balance del so mandatu coincidiendo col 20 de xunetu, fecha de la so toma de posesión como presidente nel 2010. Güei cúmplense 3 años d’esi día y nel so balance d’esti tiempu, intervención na que sólo emplegó'l castellanu, rescampló’l so enfotu de facer una “defensa numantina de los intereses d’Asturies per delantre de cualquier otra cosa”.

“Asturies necesita una mirada llarga, a mediu y llargu y plazu, porque Asturies tien que siguir desendolcando un procesu de tresformación económica como nun recordamos na nuesa historia”, siguió’l presidente, que confirmó que’l 8 de setiembre va anunciar los sos planes de futuru que, ensin dicilo, pasen por presentase a la reeleición. El socialista destacó que “recuperamos el nuesu sentimientu de pertenencia. Asturies siéntese más arguyosa de la so propia historia” y aseguró que “vamos poner tol esfuerciu, reconociendo’l realismu pero negándonos el pesimismu, en buscar la meyor Asturies”.

Al respeuto de la recuperación d’esi arguyu de pertenencia, apuntó que “si dalgo carauterizó a esti Gobiernu foi la defensa de l’asturianía. Fixímoslo na conmemoración del 40 aniversariu del Estatutu d’Autonomía; nel 40 aniversariu de cuando tomara posesión el mio antecesor Rafael Fernández; cola conmemoración del Día de la Bandera recuperando la celebración del 25 de mayu, tan importante na historia; o agora, conmemorando los 1.300 años del batalla de Cuadonga. Una reivindicación ensin complexos, tamién en tolos aspeutos culturales, incluyíes les llingües d’Asturies, l’asturianu y l’eonaviego”.