N’Ast y l’Atenéu Cultural Xuan María Acebal entamen la Tertulia Enrique García-Rendueles

Les dos asociaciones van celebrar una tertulia cultural tolos xueves a les 20 hores nel Centru Social L’Ayalga, anque nun futuru ye posible que tamién pueda visitar otros conceyos. Ésta va llevar el nome d’Enrique García-Rendueles.
 
Según anuncien N’Ast y l’Atenéu Cultural Xuan María Acebal, esta tertulia naz “col oxetivu de configurar un espaciu abiertu d'alcuentru y alderique sobre la hestoria, la cultura y la situación na que s'afaya'l país”. Pa ello, dediquen el nome d’esti eventu que va celebrase los xueves a Enrique García-Rendueles (Cimavilla, 1880-Xixón, 1955) –autor d’obres de la importancia de ‘Los nuevos bablistas’– “n’homenaxe y alcordanza de quien ellaboró ún de los plantegamientos socio-llingüísticos sobre la realidá asturiana más avanzaos del tiempu anterior a la década de 1970 y al nacionalismu contemporaneu”.
 
El Centru Social L’Ayalga, sede de la tertulia, ta asitiáu na xixonesa cai Decanu Prendes Pando, númberu 11.