N’Ast entama una campaña p’ayudar a aquelles persones que quieran meyorar el so asturianu

Trátase del ‘Voluntariáu llingüísticu’. L'asociación cultural de defensa de la llingua del país va facer d’interlocutor ente voluntarios más avezaos a usar l’asturianu y persones que quieran meyorar el so dominiu del idioma.
 
Esta iniciativa de N’ast, asemeyada al ‘tándem’ tan utilizáu polos estudiantes Erasmus, ta empobinada a aquelles persones “que nun saben falar asturianu o que nun tienen posibilidá d'emplegalu na so vida diaria pola situación de marxinación y represión llingüística que carecemos n'Asturies”. Asina, los voluntarios destinaríen una hora a la selmana, demientres un mínimu de diez selmanes, pa charrar n’asturianu con otra xente.
 
Les persones que quieran participar nel ‘voluntariáu llingüísticu’ nun deben tener amplios conocimientos académicos, namái usar un asturianu correutu y asistir a un cursu de formación p’aprovechar meyor esta actividá. Los interesaos en formar parte d’esti proyeutu deben comunicase con N’Ast na direición nast.oficialida@gmail.com.