N’Ast critica la desapaición del sofitu de Xixón a la promoción editorial

L’Asociación Cultural N’Ast protesta contra la desapaición del sofitu económicu que’l Conceyu de Xixón venía dando a la promoción editorial. Demanda que, al menos, se mantengan les ayudes a la edición en llingua asturiana.
 
Según comuniquen dende’l coleutivu, el sofitu que Xixón venía dando a la promoción editorial por valor de más de dos millones d’euros ente’l 2010 y 2011 pasó de sópitu a cero cola entrada de Foro Asturias Ciudadano nel gobiernu municipal, “precisamente nun momentu especialmente difícil pal seutor editorial asturianu”. “Si bien entendemos que les circunstancies nun permiten caltener los niveles d’inversión anteriores, la desapaición d’esta llínea d’actuación supón non sólo un dañu al espardimientu de la cultura, sinón tamién a la mesma economía asturiana, yá que les industries culturales son una fonte de riqueza qu’enxamás se potenció de forma correcha”, reclamen.
 
N’Ast pide al Conceyu de Xixón que, al menos, caltenga’l sofitu a la edición en llingua asturiana “dao la conocida situación d’amenorgamientu que carez la nuesa llingua nacional por mor de la falta de respetu a los derechos democráticos de los asturianos en materia llingüística”.