Muyeres lleva a Mieres el so espectáculu 'Humanes'

Les entraes yá tán a la venta pa esta cita programada pal sábadu 16 de marzu.

La oportunidá próxima pa ver 'Humanes', el reconocíu espectáculu de Muyeres, va ser en Mieres. El nomáu Mieres Centru Cultural va acoyer l'actuación na qu'esti proyeutu musical, que lleva al escenariu a unes 28 persones, presenta per primer vez composiciones propies con orixe nun discu reconocíu nel 2021 col Premiu AMAS al Meyor Discu Folk.

En 'Humanes' cuéntense 13 histories de muyeres, dalgunes reales y otres ficticies, "qu'alternaron con Lorca, d'estravagantes solitaries en pueblos pequeños, d'aquelles que venguen la muerte d'un ser queríu con otra muerte más, de chigreres que se dexen querer o d'ermitañes rodeaes de llobos (y llobes)". Marta Elola encárgase de la direición musical y Borja Roces de la escénica, mentes que la responsable del vestuariu ye Azucena Bedia y del diseñu de lluces, Eduardo Espina.

El preciu del espectáculu, que va principiar a les 20 hores, ye de 12 euros. Éstes tán a la venta nesti enllaz y, de manera física, na Llibrería La Llocura.