Muyeres compón per primer vegada cantares propios pal so trabayu nuevu, ‘Humanes’

Histories de muyeres, reales o de ficción, conformen el trabayu nuevu de l’Asociación de Música Tradicional Muyeres, que lleva’l nome de ‘Humanes’. Per primer vegada na so historia, el coleutivu nun va cantar pieces recuperaes de la tradición, sinón compuestes a costafecha pal proyeutu, que se va estrenar en xineru en Xixón.

‘Humanes’ ye un discu y espectáculu que pretende bucear na contradicción, imperfección y vulnerabilidá de cualesquier ser humanu. La puesta n’escena ta diseñada y empobinada por Borja Roces, y recueye, ente otres, histories de muyeres qu'alternaron con Lorca, d'estravagantes solitaries en pueblos pequeños, d'aquelles que venguen la muerte d'un ser queríu con otra muerte más, de chigreres que se dexen querer o d'ermitañes rodeaes de llobos (y llobes); en definitiva, de "muyeres ensin mieu y imperfeutes, pero que na so maraviyosa y imperfeuta esencia, tamién son humanes. Como nosotres, como tantes otres".

Antón García, direutor xeneral de Política Llingüística; Marta Elola, direutora musical; Roces; y componentes del grupu Muyeres presentaron esta mañana ‘Humanes’, que se va estrenar el sábadu 11 de xineru a les 20 hores nel teatru de la Llaboral. Les entraes yá tán a la venta a un preciu de 20 euros nel fosu, de 18 euros nel patiu de butaques, de 15 euros nos palcos y de 12 euros nel anfiteatru.

Na semeya, Elola, Roces y García.