Muyeres celebra 20 años n’escena con un conciertu en Piedrasblancas

El Valey Centru Cultural de Castrillón acueye esti sábadu un conciertu col que’l coleutivu Muyeres celebra 20 años n’escena. Les 24 persones que conformen esti grupu van basar l’actuación nos cuatro discos qu'espublizaron hasta la fecha.

Muyeres Asociación de Música Tradicional echó andar nel 1993 con componentes femenines de dellos grupos d’investigación etnográfica, como Andecha Folclor d´Uviéu, L´Aniciu, Escontra´l Raigañu, Xurgar nas Costumes o Concetsones, baxo coordinación de Lisardo Lombardía y col enfotu de reivindicar la música de percusión del país y el papel de la muyer como protagonista y depositaria de la tradición musical asturiana. Venti años depués, esti oxetivu cumplióse gracies a un trabayu importante que llevó al coleutivu a editar cuatro discos con Fonoastur, ‘Muyeres, Dances, bailles, ramos, romances y cantares de los conceyos d’Asturies’ (1993), ‘Muyeres II’ (1997), ‘Pasamentu’ (2001) y ‘Onde la culiebra canta’ (2006), a lo qu’hai que sumar dellos espectáculos en direuto. L’últimu d’ellos foi ‘Inda suenen’, xunto cola compañía teatral Factoría Norte, que percorrió dellos escenarios del país ente 2010 y 2012.

En ‘Muyeres en conciertu, 20 años sobre la escena asturiana’ el coleutivu va ufrir un espectáculu de 90 minutos basáu nos sos cuatro discos dobles, que sumen cerca de 200 cantares. L’actuación va tener llugar mañana a les 20 hores nel Valey Centru Cultural de Castrillón, en Piedrasblancas, con entraes al preciu únicu de 4 euros.