Música, sidra y cerveza artesano nes dos cuenques esta fin de selmana

|
Cartelos La Flor y FICAL 2023

Llega la primavera y entamen les fiestes y celebraciones a ocupar el calendariu asturianu. Esta fin de selmana’l focu va tar nes dos cuenques: La Pola celebra La Flor y La Felguera acueye’l Festival Internacional de Cerveza Artesano de Llangréu (FICAL), que programen conciertos de bandes como Dixebra, Skama la Rede o Algaire.

En Ḷḷena tán festexando La Flor estos díes, cola presencia de grupos y orquestes como Assia (güei), Cuarta Calle (mañana) o Clan Zero (domingu), amás de munches actividaes y la vista puesta na romería del llunes nel prau La Flor de Piedracea. Una parte importante de la celebración ye’l XVIII Mercáu Tradicional La Flor de Ḷḷena, nel barriu La Caleya, qu’esti añu recupera’l formatu habitual depués d’una edición más pequeña por cuenta la situación sanitaria pola pandemia de COVID-19, nel que lo asturiano y la sidra ye protagonista.

Va abrir mañana a les 10 hores y va contar con una alborada de pareyes de gaita y tambor, y pasucais de la Banda de Gaites Güestia, organizadora del mercáu, col pregón y actos institucionales previstos a les 12.30 hores. Pela tarde, llueu de delles actuaciones musicales, van entamase unes xornaes de convivencia de los talleres de la Escuela de Música Tradicional, cuentacuentos, teatru y presencia de Los Zamarrones, pa finar, dende les 20 hores, col conciertu de Xuacu Amieva & Dobra, y Dixebra.

La Bandina’l Garrote va amenizar l’alborada del domingu, que va contar con pasucais de les agrupaciones de baille Flor de Xaranzaina y Les Xanines de Quintes, y una ruta cultural per La Pola lliteraria, que va tener continuidá pela tarde. A les 13 hores va entamase’l Festival de Canción Asturiana ‘Ayalgues de l’asturianá’ con Alicia Villanueva, Odón del Paganéu y Luis Álvarez Pola.

Pela tarde ta prevista una ‘Tarde en danza’ dende les 19 hores con Güestia, la Bandina’l Busgosu y Pandereteres del Artusu. A les 21.30 va pesllar el mercáu Algaire.

3 díes de conciertos

Un añu más los xardinos de la Pinacoteca Eduardo Úrculo acueye’l Festival Internacional de Cerveza Artesano de Llangréu (FICAL), que per tres díes va llevar a La Felguera productores de cerveza de dientro y fuera d’Asturies, y muncha música de primer nivel. Los asistentes van poder prebar la bébora de Caleya, Asturias Brewing Company, D’Equí, Naparbier, Laugar, Dougall’s, Sáez and Son, Garage, La Pirata, La Grúa, Redneck, Saltus, Basqueland, Sanfrutos, 3 Monos, Lervig, Prizm, Akia Brygghus y Brew by Numbers, y participar en delles actividaes y acudir a charres especializaes.

L’accesu, de baldre, permite ver tolos conciertos. Na primer xornada, esta tarde, van tocar Kinkis Gruñones (20.30 hores), O’funk'illo (22), International Hardcore All Stars (23.45), Dixebra (00.45) y Skama la Rede (2).

Mañana, mentes, va arrancar la música con Polémika (19.30 hores) y siguir con Pin Pals (21), Niña Coyote eta Chico Tornado (22.15), Mausoleo (23.45), Miguel Costas (00.45) y Los Bárcenas (2.15), protagonizando la sesión vermú Los Jimaguas (13 hores). El domingu, a les 14 hores, ta prevista l’actuación de 2 Insolentes.

Contador Estadistiques