Murray y Pallant algamaron n'Avilés el Mundial de Duatlón

El sudafricanu y la británica foron los más rápidos na prueba elite del sábadu.

Yera'l más fuerte según los sos rivales y asina se comprobó nel Mundial avilesín de duatlón, que destacó pola so organización y la respuesta del públicu. Richard Murray nun dio pie a la sorpresa y llevó'l títulu tres una carrera que se rompió pronto y que llegó al tramu últimu a pie con cinco homes destacaos. Finalmente, el sudafricanu llegaría a la zona del Niemeyer, onde taba instalada la meta, en solitariu y con tiempu de sobra pa celebrar la victoria. En segundu llugar aportó l'español Emilio Martín y, terceru, l'holandés Jorik Van Egdom.

"Ye la segunda vegada que me proclamo campeón del mundo de duatlón. La primera foi na categoría junior, hai 12 años, asina que toi mui satisfechu y puedo asegurar que nun foi pa nada fácil”, señaló'l sudafricanu, qu'añadió que "toi mui agradecíu al públicu d'Avilés pol ciñu que nos demostró tola carrera”.

Enantes, na carrera femenina, Emma Pallant revalidaba'l títulu de campeona del Mundu. Una escapada a falta de dos quilómetros pa la meta permitió a la británica dexar atrás a les sos rivales y algamar la victoria final. Completaron el podiu la sudafricana Andrea Steyn y la española Margarita García Cañellas, mentes que l'asturiana Laura Álvarez Bedia terminó la prueba en decimosegunda posición.

Dio la casualidá de qu'esti segundu cetru mundial de Pallant coincidió col so cumpleaños, polo que'l públicu presente nun duldó en canta-y el 'Cumpleaños feliz'. “Na bicicleta taba too bastante controlao y decidí reservame pa la vuelta cabera de la carrera a pie, y la verdá ye que too salió como queríemos, yá que tenía previsto atacar nos 2,5 quilómetros caberos de carrera”, apuntó.

Na nuesa seición 'Galeríes' pues disfrutar d'una escoyeta d'imáxenes de les pruebes.

Na semeya, Murray nel grupu de cabeza, siguíu del holandés Van Egdom.