Murcia 1 - Uviéu 1

L'Uviéu xugó un mal partíu énte'l Murcia, un equipu de lo más ramplono de la segunda división que nun tendría que ser pilancu nel camín d'un aspirante al ascensu. El mazazu de la otra selmana en casa contra l'Elche y los acontecimientos estradeportivos que tan alloriando al equipu notolos l'Uviéu nun partíu que dexa a los carbayones a cinco puntos del ascensu gracies a los fallos de los sos rivales pero nel que nun se vio un Uviéu con traza d'ascender.Yá de la qu'entamó'l partíu viose que los azules - vistíos ayeri de verde- nun teníen alma pa ganar al Murcia. ensin más arma que los balones llargos p'alantre, l'Uviéu renunciaba a xugar curioso, mientres los murcianos diben allegándose a la portería d'Esteban, ayeri salvador del equipu. Los asturianos aguantaben malamente, pero cuando taba p'acabar la primer parte Gurruchaga tiró a Godino dientro l'area. Aguilar tiró'l penalti, aventayando al Murcia.El segundu tiempu la suerte volvió pa col Uviéu, qu'empataba'l partíu gracies al gol dende lloñe de Javi Paredes. El Murcia, que nun contaba con ello, quedó un poco fuera bolos mientres los asturianos intentaben garrar el mandu. Un intentu baldíu, porque los murcianos volvieron a mandar cola entrada d'Alfonso. El delanteru murcianu empeñose n'amargá-y la tarde a Esteban, que yá nun tuvo más descansu. Mientres, la nave azul esfarraplaba dafechu cola quinta espulsión d'Onopko esti añu. El rusu dexa colgáu al equipu casi de xuro pa los partíos que queden. A la fin, suerte que se pudo empatar.

Contador Estadistiques