'Mundu sidreru' remata la segunda temporada con grandes datos d'audiencia

|
'Mundu sidreru' con Víctor Manuel

La selmana pasada l'espaciu de TPA algamó una cuota de pantalla del 8,1 por cientu.

Mañana, a les 22.15 hores, va emitise'l capítulu caberu de la segunda temporada de 'Mundu sidreru', el programa dedicáu a la cultura sidrera presentáu por Inaciu Galán en llingua asturiana dafechu. Víctor Manuel va protagonizar la entrevista d'esti episodiu, fecha na Quinta Asturias del Centro Asturiano de Madrid, na que'l cantante va falar "de la so carrera musical, de cómo vive la so rellación cola música asturiana y por supuestu de la Sidra d’Asturies".

Esta segunda temporada del programa de Cuatro Gotes Producciones pa TPA, cola collaboración de la Denominación d'Orixe Protexida (DOP) Sidre d'Asturies, ta siendo un ésitu d'audiencia, al igual que tolos espacios n'asturianu de la canal pública. Asina, el miércoles pasáu, nel que Galán entrevistó a otru gran cantante asturianu, Vicente Díaz, algamó la cifra más alta de los nueve emitíos este selmanes con una cuota de pantalla del 8,1 por cientu –la media de TPA en xunu foi del 5,6 por cientu– y 30.000 espectadores, según los datos daos pola Federación d'Organismos o Entidaes de Radio y Televisión Autonómicos (FORTA), convirtiéndose, depués de 'El Picu' y 'TPA Deportes 2', no más visto del día.

Contador Estadistiques