Munchos estudiantes, pocos mayestros

El númberu d'estudiantes que pidieron l'asignatura de llingua asturiana medró esti añu. La entrada del asturianu nel bachilleratu vieno a enanchar el tiempu en que los rapacinos y rapacines d'Asturies puen cursar esta asignatura, llendada de mano al enseñu básicu. Esti aumentu de la ufierta, xunta'l repunte depués d'un cursu como'l del añu pasáu en que menguanon los racinos que la daben parez que pinta un cursu un poco menos malu pa la escolarización del idioma, con un total de 17.981 alumnos matriculaos nun total de 335 centros.

Sicasí, nun ta tan claro que la cosa vaya ser asina, y ello ye por dellos factores. Primero de too, anque la ufierta d'asturianu llega esti añu hasta'l bachilleratu, quien quiera matriculase d'asturianu nesta estaya educativa tien que tenelo estudiao primero na ESO, onde namás un númberu simbólicu de centros llegaron a dar l'asignatura. Sicasí, el númberu d'estudiantes en secundaria pue doblase esti añu, pasando de 1.063 a 2.172 matriculaos en secundaria ente ESO y bachilleratu.

En segundu llugar, una cosa ye que los alumnos se matriculen y otro bien distinto ye que lleguen efectivamente lleguen a dar l'asignatura porque nun haya profesoráu pa impartila. Col cursu ya entamáu, los sindicatos d'enseñanza siguen denunciando, como pasa tolos años per esti tiempu, les picardíes que gasta l'alministración a la hora de contratar personal. Como l'asignatura d'asturianu nun da hores abondes pa que l'enseñante complete la xornada, lo normal hasta agora yera que l'alministración obligare a tener otra especialidá pa completar les hores, lo que ponía munches torgues polo difícil que ye dar con xente que tenga esi perfil profesional. Dende'l sindicatu SUATEA desplicaron a Asturies.com qu'esti añu consiguiose'l compromisu de que pudieren ofrecese medies places d'asturianu ensin tener falta completales con otra materia, pero denuncien que lo que fizo la Conseyería d'Educación foi da-y la vuelta a la tortiella, convocando places n'otres especialidaes pero que tienen que completase con hores d'asturianu, colo que queden entovía más places ensin cubrir.Otramiente, según denunció la organización Xeira, nun se fizo una llista propia de gallegu-asturianu pa la parte del Navia-Eo, lo que llevó a axudicaciones

a xente non convocao y a delles irregularidaes que vienen a agravar la situación del enseñu del asturianu nuna comarca abondo escaecida.