Muerre un escalador vascu en Vegarreonda

La operación de busca de los servicios d'emerxencies del Principáu p'alcontrar a los cinco montañeros que quedaren enterraos por un argayu de ñeve ayeri nos Picos d'Europa remató col rescate con vida de cuatro de los escursionistes y del calabre del quintu montañeru, procedente d'Euskadi, lo mesmo qu'otros trés miembros de la cordada, mientres que los demás miembros del grupu yeren dos asturianos.

Los cambeos de temperatura d'estos díes pudieron causar l'argayu, ún de los más grandes que se recuerden nel llugar.

Dientro de la desgracia, diose la suerte de que l'argayu arroyó a cinco persones d'un grupu de seyes montañeros, colo que'l sestu alpinista pudo llamar al 112 pa dar parte del accidente. Entamaba asina a la 1 menos cuarto de la mañana d'ayeri domingu un dispositivu de rescate que tuvo un llabor bien difícil al alcontrase los montañeros nuna parede vertical na redolada de Vegarreonda, no cimero del macizu occidental de los picos d'Europa. Los servicios de rescate tuvieron d'allegase hasta la zona n'helicópteros, que tuvieron d'emplegase tamién pa llevar a los cuatro accidentaos con vida hasta l'hospital de Les Arriondes, onde los trataron de les mancadures y de la esposición al fríu, rematando tola operación de rescate enantes de les 4 de la tarde