Muerre Miguel Ramos Corrada, vicepresidente de l’ALLA

Na mañana d’esti martes finó en Xixón Miguel Ramos Corrada, vicepresidente actual de l’Academia de la Llingua Asturiana (ALLA). El filólogu natural de Llerandi ocupó la presidencia de la institución nos años 2000 y 2001.

Ramos Corrada, de 63 años, taba al frente de les coleiciones lliteraries ‘Llibrería Académica’ y  ‘Mázcara’ y tamién yera miembru del Conseyu de Redaición de les revistes  ‘Lliteratura’ y ‘Lletres Asturianes’. “Los sos trabayos y aportaciones sobre la lliteratura asturiana foron y son referencia d’esta materia pa investigadores y estudiosos en tol mundu. Un exemplu d’esti facer ye la ‘Historia de la Lliteratura  Asturiana’, obra fundamental pa la conocencia de los nuesos escritores, de la que’l Profesor Ramos foi coordinador y el so principal afalador”, recuerden dende l’ALLA, que, amás del so llabor investigador, “amuesa de rigor y honestidá’, empondera’l so compromisu firme “colos sos ideales sociales, con una  militancia clara yá dende la so mocedá na defensa de los valores democráticos y na llucha por una enseñanza pública y al algame de toos, y onde la cultura y la llingua d’Asturies ocupen un llugar cimeru”.

Xunto al so trabayu académicu, el parragués criáu en Xixón llevó alantre una llarga xera docente ya investigadora na direición n’Asturies de la Universidad Nacional de Educación a Distancia (UNED) y, darréu, na Universidá d’Uviéu. “Foi esti llabor un exemplu de dedicación y entrega, enllenu d’un espíritu constructivu, onde’l  diálogu y el respetu pa con aquellos que nun compartíen les sos idees yera la norma nel so facer”, destaquen dende la institución académica.

El funeral pola so alma va tener llugar mañana, na ilesia de San Xulián (Somió), a les 17.30 hores. Dende l’equipu que conformamos Asturies.com queremos unviar un abrazu fuerte nesti momentu duru tanto a la familia de Ramos Corrada como a los miembros de l’Academia de la Llingua Asturiana y de la comunidá universitaria.