Muerre Luis Argüelles, fundador del Muséu del Pueblu d’Asturies

Luis Argüelles, fundador del Pueblu d’Asturies y del Muséu de la Gaita, morrió’l sábadu en Xixón a los 84 años. Esti amante de la cultura asturiana foi tamién, col so trabayu, ún de los responsables del la recuperación del traxe del país.

Tres munchos esfuercios pa convencer a los responsables políticos de la época y algamar financiación, Argüelles fixo realidá’l so suañu de dar forma al Muséu del Pueblu d’Asturies nel añu 1968. Xunto con Avelino Moro principiaron a dar conteníu a una instalación que vivió un momentu d’esplendor na década de los 70. Un cambiu de xiru que se pretendía nel mesmu llevó a una destitución inxusta d’Argüelles nel so cargu de responsable del recintu, que quedaría abandonáu per una década hasta la so recuperación, yá nos 90.

Argüelles finó ayeri tres nun poder superar una neumonía que lu llevara al hospital. Detrás queden años y años de trabayu pa que nun quedara nel escaezu una cultura asturiana que diba camín de desapaecer. La llingua, la recuperación d’histories mitolóxiques y el traxe del país, el mundu rural…, son dalgunes de les estayes poles que puxó nesti tiempu. Un llabor que foi bien reconocíu pola sociedá civil, qu’entamó nestos años últimos los homenaxes que les instituciones nun fixeron. Asina, l’Asociación Cultural L’Arribada declarólu miembru honoríficu del coleutivu nun actu emotivu celebráu en xineru del 2012 y un grupu de ciudadanos instaló en setiembre nun llateral del edificiu qu’acueye’l Muséu de la Gaita una placa de recuerdu pa él y pal so compañeru Moro.

La capiella ardiente d’Argüelles ta instalada na sala 13 del Tanatoriu de Xixón. El funeral pola so alma va celebrase mañana, a les 17 hores, na ilesia parroquial de La Resurrección, na cai L’Infiestu.   

Na semeya, momentu nel que Carlos Rubiera entrega a Luis Argüelles en nome del Conceyu de Xixón una placa d’agradecimientu baxo la mirada atenta d’Alberto Álvarez Peña nun actu d'homenaxe de l'Asociación Cultural L'Arribada celebráu en xineru del 2012.