Muerre d'un infartu Manuel Preciado, ex entrenador del Sporting

Un infartu acabó esta madrugada cola vida de Manuel Preciado, ex entrenador del Sporting. El cántabru, de 54 años, taba en València y el Villarreal diba presentalu esti vienres como téunicu del equipu castellonense pa esta temporada.
 
La familia roxiblanca ta de llutu. El téunicu que devolvió la ilusión al sportinguismu tres una década de travesía pel desiertu de la Segunda División y que se mantuvo al frente del banquillu d’El Molinón per seis temporaes –el conseyu d’alministración cesólu a finales de xineru pola trayeutoria que llevaba l’equipu–, morrió’l día enantes d’acudir a Vila-real pa ser presentáu pol equipu castellonense. El presidente de la entidá mariella, Fernando Roig, confiara a Preciado’l proyeutu pa devolver al club a la Primera División, al que’l cántabru incorporaba a Josep Alcácer como ayudante y al xixonés y espertu en deportes tradicionales, Gerardo Ruiz, como preparador físicu. El propiu Ruiz despidióse ayer mesmu en Mareo como emplegáu del Sporting tres 17 años nel club tres el pidimientu del d’Astillero pa que lu acompañara nesta aventura.
 
Con 232 partíos oficiales dirixidos, Preciado ye’l segundu téunicu que más tiempu tuvo al frente del Sporting, namái superáu pol seleicionador asturianu absolutu nos trés partíos que disputó Asturies nesti sieglu, José Manuel Díaz Novoa. Na so segunda temporada en Xixón, el cántabru algamó l’ascensu a Primera, el quintu de la so carrera tres conseguir xubir de categoría cola Gimnástica de Torrelavega (a Segunda B), Racing B (a Segunda B, en dos ocasiones) y Levante (a Primera). Llueu consiguió la permanencia per trés temporaes consecutives pese a los escasos recursos económicos del Sporting, que’l 31 d’avientu d’esti añu ha de terminar de pagar, por llei, la deuda ordinaria tres pasar un procesu concursal. Amás de los banquillos enantes citaos, el d’Astillero tamién entrenó al Real Murcia. Como futbolista, Preciado xugó como defensa nel Racing, col que debutó nel 1978 y se mantuvo hasta’l 1982, Linares, Mallorca, Alavés, Ourense y Gimnástica, onde colgó les botes nel 1992.