Movilizaciones del profesoráu de llingua

Los sindicatos asturianos d'enseñanza asturianos cellebraron esti vienres na sé de la UXT d'Uviéu una xunta pa tratar el tema de la presencia del asturianu nel curriculum educativu, que pa los tres mayoritarios (UXT, CCOO y SUATEA) ye insuficiente dafechu. Según diz nel durísimu comunicáu conxuntu de los tres sindicatos sobre esti conceyu que tovieron, el Principáu, cola política que ta siguiendo nesti tarrén yá nun ye que tea renunciando a la responsabilidá que tien de diseñar les propies enseñances, sinon que renuncia "al conteníu científicu d'una escuela democrática integrada nel mediu" colo que "recupera l'efeutu de l'antigua escuela del pensamientu únicu ya imperial". En consecuencia, los sindicatos afítense no que yá dixeren de nun aceptar la redacción del curriculum educativu definitivu, que presentaba la llingua asturiana como "bable/asturiano" dando en cuenta d'esti la primer versión que se fizo y que dio de pasu'l Conseyu Escolar d'Asturies, na que se daba un tratu bien distintu a l'asignatura. Amás d'ello, los tres sindicatos alcordaron en facer xuntes con asociaciones de padres, equipos directivos y claustros pa esponer la situación y entrevistase con tolos partíos que se presenten a les prósimes elecciones del 25 de mayu. Xunta estes midíes informatives y de debate, los sindicatos anuncien concentraciones de protesta contra'l Presidente Areces y el Conseyeru Vallina dende la última selmana de xineru.