Movilización del 8-M en Llangréu: el feminismu quier llegar “a toes partes”

Falamos con Raquel García Herrero, d'Asturies Feminista 8M, que nos cunta los detalles d'una manifestación baxo'l lema ‘A golpe de tacón dando tira' esti 8 de marzu, Día Internacional de la Muyer, que s'espera masiva.

Depués de tomar les cais de Mieres el 8-M pasáu con una gran movilización, Asturies Feminista 8M sigue cola so apuesta de llevar les reivindicaciones feministes “a toes partes”. Llangréu ye’l llugar escoyíu pola asamblea esti añu pa entamar una manifestación baxo’l lema ‘A golpe de tacón dando tira’ con salida en La Felguera y final en Sama.

Güei, 8 de marzu, celébrase’l Día Internacional de la Muyer y Asturies va vivir actividaes reivindicatives a lo llargo de tola xornada. L’actu central nesta ocasión va tener llugar en Llangréu, siguiendo l’apuesta d’Asturies Feminista 8M de sacar la reivindicación de les grandes urbes del país.

“En Siero’l 25 de payares hebo una respuesta increíble, paecía un 8 de marzu”, recuerda Raquel García Herrero, una de les voceres de l’asamblea, que tamién cita los “25.000 de Mieres” l’añu pasáu. “Nosotres centrámonos no cualitativo. Paeznos más importante que les muyeres que nun participaron enantes salgan a la cai, s’impliquen nes aiciones previes; que lleguemos col feminismu a toes partes y averanos cada vez más a la zona rural. Ye una clave del feminismu asturianu”, espresa.

El ‘Compañera dame tira’ trescendió a un nivel que nun lo imaxinábamos

Llangréu ye’l llugar escoyíu nesta ocasión, plaza qu’anima a les feministes a convertir esti 8-M nun “homenaxe a les muyeres de la Güelgona del 62. Amás va malpenes dos meses que nos dexó Anita Sirgo y Maruja, y entós facemos un pequeñu recuerdu a estes figures”. Y el lema de la cita, como nun podía ser d’otra manera, recueye esi reconocimientu: “A golpe de tacón dando tira’, dando tamién continuidá al ‘Compañera dame tira’ del añu pasáu en Mieres.

“El ‘Compañera dame tira’ trescendió a un nivel que nun lo imaxinábamos. Resignificamos esti términu y pasámoslu al femenín, y yá ye dalgo qu’utilizamos nel día a día toles feministes asturianes, y inclusive más allá del feminismu”, rescampla la vocera, que pon a Sirgo y al restu de muyeres que lideraron la Güelgona del 62 como “referentes na llucha pa nosotres”.

Espeutatives y demandes

La espeutativa pa esta ocasión ye “igualar o superar” la cita de Mieres del 8-M pasáu. “Llevamos 29 autobuses confirmaos de toa Asturies más 2 trenes que van dir dinamizaos por compañeres, ún que sal d’Uviéu de Parque Principado y otru de Xixón”, confirma García Herrero, ensin escaecer los que se desplacen nel so coche particular y la población de Llangréu.

La salida va ser a les 19 hores del Parque Nuevo de La Felguera y el final nel Parque Dorado de Sama. Ehí va lleese’l manifiestu d’esti 8-M y van entamase delles actividaes.

“Tenemos una perspeutiva amplia de demandes como tolos años”, apunta la vocera d’Asturies Feminista 8M, asamblea qu’engloba a coleutivos y feminismos “de tou tipu”. “El recuerdu a los feminicidios, les migrantes, les pensionistes, la educación...” son cuestiones que se van tratar nuna manifestación que va “tener mui presentes les compañeres palestines y la llucha del pueblu palestín”.

Tenemos un tresfondu completamente políticu y social

“Vamos a gritar y organizar la rabia, tenemos un tresfondu completamente políticu y social. Nun perdemos de vista nin la perspeutiva de clase nin les represiones raciales nin otres cuestiones que nos alcancen a les muyeres”, asegura García Herrero, que rescampla el calter “tresformador del feminismu”.

Concentraciones nes places

La reivindicación el 8-M nun se va centrar namái na marcha de Llangréu. A lo llargo de tol día tán convocaes concentraciones y eventos per tol país.

Como vien siendo habitual estos años, van entamase actos frente a les cases conceyos onde va lleese’l manifiestu d’Asturies Feminista 8M. Esti añu hai convocatoria n’Avilés, Mieres, Siero, Uviéu, Llanes, Ribeseya, Colunga, Piloña, Onís y nel propiu Llangréu, mentes qu’en Cabrales va facese a les 18 hores.

Manifestación alternativa en Xixón

A les 19 hores, con salida na plaza de toros de Xixón, va entamase una manifestación alternativa col lema ‘Por un feminismu de clase y combativu’. Ésta organícenla la Plataforma SAD Asturias, Libres y Combativas, Red de la Clase Trabayadora (RCT), Colectivo de Trabajadores (CT) y Sindicato de Estudiantes y Izquierda Revolucionaria, coleutivos que recuerden la situación del pueblu palestín y demanden el “altu al xenocidiu israelín en Gaza”.

Tamién ta convocada esta xornada pol Sindicato de Estudiantes y Libres y Combativas una fuelga estudiantil feminista, qu’inclúi una movilización al meudía en Xixón y Uviéu. El lema emplegáu ye ‘¡Nos siguen violando y matando!’.

Na semeya, un momentu de la manifestación del 8-M en Mieres del añu pasáu.