Morrió'l llingüista Jesús Tuson

L'autor de 'Mal de llingües' morrió esti sábadu en Barcelona a los 77 años.

Tuson, nacíu en Valencia en 1939, foi catedráticu de filoloxía y profesor de llingüística de la Universitat de Barcelona (UB) hasta la so xubiliación en 2009. Foi fundador nesa universidá del primer departamentu de llingüística nes universidaes españoles. Amás de la so docencia nel campu de la llingüística, ye de destacar el so trabayu na difusión y defensa de la pluralidá llingüística y a desactivar prexucios llingüísticos qu'hai sobre les llingües minorizaes.

Ye autor, ente otres, d’obres como Lingüística: una introducción al estudio del lenguaje (1984), El luxe del llenguatge (1986), Mal de llengües (1988), L’escriptura (1996), Històries naturals de la paraula (1998), ¿Com és que ens entenem? (1999), Una imatge no val més que mil paraules (2001), Patrimoni Natural (2004), Això és (i no és) Allò (2008), y Quinze lliçons sobre el llenguatge (2011)

N'asturianu tenemos tornada una de les sos obres más significatives: Mal de Llingües, editada por Araz en 2009. Esti ye un llibru col que de manera seria y bien didáctica combate los prexuicios llingüísticos. Héctor García Gil, el traductor d'esti llibru al asturianu, afita que “dende l’argumentación y la razón” va desmontando “caún de los tópicos y prexuicios negativos existentes na sociedá contra les otres llingües, aquélles que nun son «la nuestra» –o la del poder–, y sobre manera contra aquélles que dan en llamar «pequeñes», «rexonales»... Frente a ello, l'autor quier facenos ver lo absurdo y irracional d’esti discursu a traviés de les contradicciones esencialistes nes que caen los xeneradores de prexuicios, por más que dellos querian vistilu o amazcaralu de técnico y racional”.