Morrió l'artesanu de gaites Alberto Fernández Velasco

Alberto Fernández Velasco (L’Entregu, 1942), ún de los constructores de gaites con más renome n’Asturies, morrió esti llunes. Pá del gaiteru Alberto Fernández Varillas, los meyores maestros d’esti instrumentu tocaron gaites feches nel so taller.
 
La perda de Fernández Velasco circuló pela tarde peles redes sociales y la música asturiana nun tardó en llamentar la muerte d’una de les persones qu’ayudó, col so trabayu, a llevar a la gaita asturiana al bon momentu actual. L’entreguín, que residió nes décades últimes en Xixón, recibió l’añu pasáu’l X Distintivu a la Investigación Folclórica Fini Suárez, gallardón qu’entrega’l Conceyu de Mieres coincidiendo cola Folixa na Primavera, y esti añu foi homenaxeáu nos Premios AMAS xunto con Víctor Manuel y el Festival Derrame Rock.
 
El funeral del artesanu, que dexara tovía hai poco la so actividá llaboral, va celebrase mañana, martes 30 d’agostu, na ilesia parroquial de Santuriu (Xixón), a les 17 hores. Depués va recibir cristiana sepultura nel Cementeriu Municipal de Deva. La capiella ardiente de Fernández Velasco ta asitiada na sala 6 del Tanatoriu de Xixón.