Moriyón y Pumares anuncien una candidatura pa siguir liderando Foro y dar continuidá al trabayu

La Comisión Direutiva de Foro aconceyada’l llunes decidió convocar el V Congresu ordinariu del partíu’l 1 d’ochobre. Asina lo anunciaron la presidenta Carmen Moriyón y el secretariu xeneral Adrián Pumares, que van encabezar “una candidatura con una Comisión Direutiva que continúe'l trabayu que fiximos nesta llexislatura tan complexa”.

“Convocamos el nuesu V Congreso pa comenzar a construyir una axenda pal cambiu qu’ellaboraremos de la mano de la sociedá asturiana nos meses próximos”, principió Moriyón, qu’esplicó que’l mandatu de la Comisión Direutiva actual fina’l 29 de setiembre. “Esta Direutiva fixo frente a un procesu internu mui complicáu, mui duru, de llimpieza, de denuncia de la corrupción y de refundación d’un partíu políticu como nun se vio nunca na historia de la Democracia española”, siguió la ex alcaldesa de Xixón, qu’agradeció l’apoyu que recibieron tanto ella como Pumares de la Comisión Direutiva actual a “les decisiones que tomamos para saniar el partíu, pagar la deuda a los nuesos proveedores y convertir Foro Asturias otra vegada nuna ferramienta al serviciu de la sociedá asturiana”.

El secretariu xeneral apuntó que “d’equí al 1 d’ochobre entamaremos un procesu de culminación de la renovación interna, pero sobre manera, de recopilación de los problemes y les idees de la sociedá civil pa ufrir una axenda pal cambiu que sía un verdaderu proyeutu políticu de cambiu p’Asturies”. Llueu d’enumerar dellos de los problemes que vive’l país rescampló que “convocamos el nuestu Congreso agora, con trés meses d’antelación, pa poder facer en paralelo una serie d’aconceyamientos con toles entidaes, coleutivos y persones que tengan soluciones qu’aportar a esta axenda pal cambiu que queremos construyir”.

El plazu de presentación de candidatures va tar abiertu del 7 al 10 de setiembre. La comisión organizadora del V Congresu va tar presidida por Emilia Calvo, conceyala de Casu, con Carlos Suárez, presidente de Foro Uviéu, como vicepresidente.

Na semeya, Suárez, Moriyón, Pumares, y Calvo, ayeri.