Moriyón, qu'arrenuncia al escañu, cataloga a Foro como "l'únicu partíu rexonalista", con "Asturies nel centru y centraos n'Asturies"

|
Carmen Moriyón renuncia

Carmen Moriyón arrenuncia al so acta de diputada tres nun consiguir formar grupu parllamentariu –Foro pasó de 3 a 2 escaños–, anque va siguir na presidencia del partíu. "Somos l’únicu partíu rexonalista con una ideoloxía y proyeutu más allá de personalismos: Asturies nel centru y centraos n’Asturies”, aseguró.

Estes pallabres paecen acolumbrar un averamientu al asturianismu de Foro, que yá dexó ver nos sos anicios, tres una estratexa política alloñada d’estes postures que tuvo na nomada ‘semeya de Colón’, con Moriyón acompañando a los líderes del PP, Ciudadanos y VOX pola xunidá d’España, el so meyor resume. Los malos resultaos algamaos el 26-M na Xunta Xeneral y nos conceyos, anque la ex alcaldesa de Xixón consiguió una representación que les encuestes poníen en dulda, esplicaríen estes declaraciones de la presidenta de formación.

“Alloñáronse muncho de los oxetivos previstos. Como cabeza de la candidatura y candidata a la presidencia del Principáu, asumo la responsabilidá política de la derrota nes urnes. En consecuencia, renuncio al acta de diputada”, aseguró ayeri tres la xunta de la Comisión Direutiva de Foro. Moriyón va volver a la so plaza en Ciruxía Xeneral del Hospital de Cabueñes tres el 15 de xunu, cuando termine’l so periodu d’alcaldesa de Xixón en funciones.

Pedro Leal, númberu 3 de la llista, va ocupar l’escañu que dexa la presidenta y va acompañar a Adrián Pumares, secretariu xeneral de Foro, na Xunta Xeneral. "Dende la presidencia de Foro voi contribuyir a propiciar los cambios necesarios p'adaptarnos al escenariu políticu nuevu y a lo que la sociedá asturiana demanda na actualidá", añadió Moriyón.

Contador Estadistiques