Moriyón acusa a Álvarez-Cascos d'utilizar les opiniones personales de dalgunos miembros del partíu pa dixebrar Foro

“Nun esiste cambiu ideolóxicu na postura de Foro”, apuntó Carmen Moriyón, presidenta del partíu, nuna carta dirixida a Francisco Álvarez-Cascos, col que protagoniza un enfrentamientu. La xixonesa acusó al fundador y recién dimitíu vicepresidente de tratar d’usar les opiniones personales de miembros pa dixebrar la formación.

“Nin siquier se plantegó un alderique”, siguió la ex alcaldesa pa defender la inesitencia d’un cambiu ideolóxicu nel partíu no que respeuta a la oficialidá o la negociación presupuestaria. “Vusté decidió utilizar les opiniones personales d’estes persones pa tratar de dixebrar el partíu”, aseguró en referencia a les pallabres d’Álvarez-Cascos sobre la incorporación, por decisión de Moriyón en base a una posibilidá que recueyen los estatutos de Foro, de los reconocíos asturianistes Xicu Xabel Díaz Yepes y José Suárez Arias-Cachero ‘Felechosa’ y del teniente-alcalde de Tapia, Guzmán Fernández López, a la Comisión Direutiva como vocales.

Una deriva “asturianista, rexonalista o nacionalista” y un averamientu al PSOE de cara a la negociación de los presupuestos –en Tapia gobierna Foro en coalición colos socialistes– foi l’argumentu qu’emplegó Álvarez-Cascos p’atacar a Moriyón, que-y respondió ayeri. “Asturianu, autonomista y constitucional”, definió la presidenta al partíu, que tamién aseguró que nun hai un cambiu de postura de Foro pa col idioma.

Na estensa carta afirmó que la dimisión d’Álvarez-Cascos “llega tarde y mal”, y recordó que toles decisiones nes “equivocaes” campañes eleutorales, nes que Foro baxó resultaos, “tuvieron orixe en o pasaron per vusté”. Tres un branu ausente, depués de la constitución del grupu parllamentariu con 2 diputaos tres la reforma del reglamentu entamada na Xunta Xeneral, “cola consecuente aportación económica al partíu qu’ello conlleva, decidió regresar pa intentar retomar el control del partíu, y nel so defeutu, sabotiar dende dientro de la Comisión Direutiva les decisiones que yo, nes mios facultaes de direición política como presidenta de Foro, tengo atribuyíes llexítimamente”, rellató darréu.

Por último, solicitó-y “que si efeutivamente desea sustituyir na so totalidá la Comisión Direutiva que yo dirixo, lo faiga pelos métodos estatutariamente previstos pa ello y non, como fixo per tantos años, al traviés les engañifes de la vieya política”.

Na semeya, Comisión Direutiva de Foro celebrada la selmana pasada, na que se produxeron los nomamientos de los trés vocales.