Moriyón repite como alcaldesa de Xixón, el PSOE lleva Uviéu y el PAS gobierna en Bimenes

Nun hebo alcuerdu ente les formaciones d’izquierda en Xixón, onde va gobernar otra vuelta Carmen Moriyón. N’Uviéu l’alcaldía ye finalmente pal PSOE pol apoyu d'Izquierda Xunida y Somos Oviedo, y en Bimenes, pal PAS.

Trés candidatos presentáronse en Xixón, Carmen Moriyón (Foro), Mario Suárez del Fueyo (Xixón Sí Puede) y Mariano Marín (PP), algamando namái l’apoyu de los sos propios conceyales, esto ye 8, 7 y 3, de manera respeutiva, nun llegando a la cifra de 14 necesarios pa tener la mayoría absoluta. D’esta forma, l’alcaldía foi pa la llista más votada, la de Foro, que caltién el Conceyu de Xixón tres unes eleiciones amargues pol so descensu importante a nivel nacional.

N’Uviéu sí qu’hebo sorpresa d’última hora pol apoyu d’IX y Somos Oviedo al candidatu socialista Wenceslao López, al que la FSA obligó a presentase tres la situación vivida en Xixón pese al principio d’alcuerdu qu’había ente les trés formaciones d’izquierda de dar l’alcaldía a Ana Taboada (Somos Oviedo). D’esta forma, el PP pierde’l gobiernu de la capital que caltenía dende’l 1991.

Una bona noticia pal asturianismu ye l’alcaldía que’l PAS algama en Bimenes, onde’l PSOE foi la primer fuercia más votada, con 4 conceyales. Aitor García Corte va liderar el gobiernu municipal tres el pautu de gobiernu ente’l PAS (3), IX (1) y Xente Yerbato (1).

Nel restu d’Asturies destaca que’l PSOE caltién l’alcaldía d’Avilés (Mariví Monteserín) y gana la de Villaviciosa (Alejandro Vega) per primer vegada en democracia col apoyu de Foro y Somos Villaviciosa. Por contra, pierde la de Llangréu, que pasa a manes d’IX (Jesús Sánchez) gracies al alcuerdu con Somos Llangréu.