Moreno algama la mayoría absoluta nes eleiciones andaluces

El PSOE empeora'l resultáu de Susana Díaz nel 2018, cuando rexistró'l númberu de votos más baxu de los socialistes n'Andalucía.

Juan Manuel Moreno va repetir como presidente d'Andalucía en solitariu y ensin la necesidá de depender de VOX. El so discursu moderáu y el so distanciamientu cola estrema derecha, sumao a la desapaición de Ciudadanos, partíu col que gobernó esta llexislatura, permitió al Partido Popular (PP) algamar el so meyor resultáu nun territoriu históricamente del PSOE, una mayoría absoluta.

Los populares consiguieron 58 escaños –la mayoría ta en 55–, más del doble que los que tenía, 26, al algamar un 43,13 por cientu de los votos col 99,68 por cientu escrutáu. La segunda fuercia ye'l PSOE, que pierde 3 escaños pa quedar con 30 (24,09 por cientu) y queda perbaxo del millón de votos.

VOX aumenta n'escaños, de 12 a 14 (13,46 por cientu), pero'l so papel va ser irrelevante. Por Andalucía, la coalición eleutoral de Podemos, Izquierda Unida Los Verdes-Convocatoria por Andalucía, Más País, Verdes-EQUO y Iniciativa del Pueblo Andaluz rexistró un mal resultáu, al algamar 5 (7,68 por cientu) de los 17 diputaos colos que contaba Adelante Andalucía.

L'Adelante Andalucía-Andalucistas de Teresa Rodríguez, que foi per llibre cola so propuesta andalucista, llevó pela so parte 2 más (4,58 por cientu), polo que la izquierda al PSOE pierde 10 escaños. Queda fuera del Parllamentu andaluz Ciudadanos, que perdió 550.000 votos, pasando del 18,28 por cientu del total del 2018 al 3,29 por cientu.

Mayor participación

La convocatoria tuvo una mayor participación que na anterior cita. Foi del 58,39 por cientu, pol 56,56 por cientu de va cuatro años.

El 1 por cientu de los votos foron en blancu y el 1,12 por cientu, nulos, cantidaes menores que nel 2018.

Gráficu de la web eleutoral de la Junta de Andalucía.