Morea celebra la fiesta los Humanitarios

Esti vienres, 11 de payares, día de Samartín de Tours. Esta folixa cumple 50 años.

Les actividaes al rodiu d'esta fiesta qu'entama la Sociedá Humanitarios de Samartín yá comenzaron a últimos d'ochobre, pero ye mañana cuando va celebrase'l día grande. A les 9 hores van llanzase los primeros voladores anunciando'l comienzu la folixa, pa depués dar pasu a l'alborada (10 hores), na que van participar les bandes de gaites Aires de Valdés, Centro Asturiano de Oviedo, El Filandón, El Gumial, El Gumial B, La Belonga, La Güestia, Esbardu, La Curuxa, El Busgosu, LaKadarma y delles pareyes de gaiteros y tamboriteros, amás de los grupos de baille Les Ayalgues d'Ayer, L'Artusu-Ruxidera, Folkore Allerán, La Hedra, La Corte, La Fonte la Faya, Xuno, Prau Llerón y Fitoria.

A les 10.30 hores ye la salida en procesión del ramu y, media hora más tarde, la misa solemne n'honor a Samartín de Tours cantada por Salvador Vázquez, con Gustavo Rodríguez Vázquez a la gaita. Tres la puya'l ramu, a les 13 hores, va tener llugar el tradicional desfile de les xandes al traviés de les cais de Morea, p'acabar cola xinta tradicional d'esta xornada, tanto en cases como en restoranes, compuesta por fabada, casadielles y panchón.

Yá de tarde, ta prevista una chicolatada (18 hores) con animación y xuegos tradicionales, y una tarde en danza (20 hores) con El Busgosu. Los fueos artificiales, a les 21.30 hores, y una danza en comuña zarren la fiesta los Humanitarios.

El pregón, esta tarde

L'Auditoriu Cine Carmen va acoyer a les 20 hores d'esta tarde la llectura del pregón de les fiestes, que va correr a cargu del periodista Javier de Montini, actu nel que ta anunciada la presencia de Fernando Padilla, direutor xeneral de Planificación Llingüística y Normalización. Darréu va presentase la Xana d'esti añu, Andrea Vidal, y el cartelu de la folixa, obra de Laura Rodríguez Noval.

L'eventu, presentáu por Celso Fernández, va continuar cola entrega del gallardón d'Humanitariu del Añu a les xandes y l'actuación de La Bonturné y de la pareya de gaita y tambor compuesta por Andrés Huerta y Carlos Fernández. Pa finar esta previa de la fiesta, va haber la plonía de voladores.