Monorock.net, una radio nueva na rede que naz pa promocionar grupos del país

Dende’l mes pasáu furrula na rede una radio nueva col enfotu de promocionar grupos de música asturianos. Ye Monorock.net, web que nun tien ánimu d’arriquecimientu y qu’emite cantares de bandes que nun tean rexistraes na SGAE.
 
N’actualidá, Monorock.net ufierta la música de 24 grupos, con dalguna banda de fuera del país. El catálogu d’esta radio online esta formáu por Anywhere, Belial, Defecto Mac, Dosis Perfecta, Distorsion Pro, Flagelum Dei, Inofensivos, Leather Boys, Los Kemaos, Michu, Stormy Mondays, The Starkwells, Tiki Motel, Tycoons, Ley Seca, Possesion, Ke t grapo, Forgotten voice, Gedeön, Medea, Fe de Ratas, El reno Renardo, Crudo y Desakato. Los de Llanera son los últimos en sumase a esta llista que va medrar en feches próximes.
 
La programación d’esta radio ta formada por dellos programes en direutu fechos polos responsables del proyeutu que se completa con una emisión de música continua de cantares de los 24 grupos que collaboren con Monorock.net. “La radio pretende consolidase nel tiempu como una referencia de la música rock d'Asturies, aidando a los grupos y solistes a promocionar al máximo los sos cantares y temes. Monorock naz col enfotu de pretender ser daqué mas qu'una radio o una web; ser un serviciu pa los grupos y pa los oyentes”, espliquen dende la web. Asina, Monorock.net inclúi información de conciertos y ta preparando dellos eventos, ente los que destaca un festival de rock.
 
Los estilos de música qu’emite esta radio nueva online van dende'l pop-rock al metal estremu, anque nun zarra les puertes a desarrollar programes d'otres músiques como pue ser la de raigaños celtes, afirmen dende Monorock.net.