Monchu'l Cura respuende nun llibru si "somos, o non, nación histórica"

'Asturies, gens Hispaniae. Iglesia local y nación histórica' (Ediciones Trabe) ye'l nome del títulu, que va presentar en Villaviciosa.

José Ramón García Fernández, conocíu por Monchu'l Cura, asoleya a los 88 años el trabayu de toa una vida. Una obra en castellanu que busca responder a la entruga de "si somos, o non, una nación" cola composición d'un rellatu que llega depués de poner enfotu en conocer la historia, recopilar datos, copiar testos 'in catena' d'autores doctos y aportar idees.

"Xente astur, nación de los asturianos, dientro de les d'Hispania; asina se nos conocía na alta Edá Media y entender y asumir too ello forma parte de la nuesa historia. Pensar de manera llibre ye bono. Pensar de manera correuta ye meyor. Por too ello, conocer bien el nuesu pasáu, los nuestos llinaxes, la presencia del cristianismu, les distintes fases de la evolución de les ilesies, el so calter sustentador y la influencia de too ello na edificación de la vieya Europa va ayudanos anguaño a construyir, ente toos, un futuru cada vez más sólidu, plural y abiertu. Un porvenir del qu'esti llibru yá forma parte", apunten dende Trabe.

L'actu de presentación de 'Asturies, gens Hispaniae. Iglesia local y nación histórica' va tener llugar esta tarde a les 19 hores nel Ateneo Obrero de Villaviciosa. La entrada ye llibre hasta completar aforu.