Molina estima que'l Muséu Arqueolóxicu d'Asturies va inaugurase na primavera del 2008

El Ministru de Cultura, César Antonio Molina, visitó esti fin de selmana les obres del Muséu Arqueolóxicu d'Asturies, n'Uviéu. Tres conocer l'estáu de los trabayos d'ampliación del edificiu, Molina señaló, en declaraciones a los medios, qu'estima que'l muséu pueda inaugurase en primavera. "Poco dempués va facelo también l'Archivu Históricu", añadió.

El Ministeriu de Cultura invirtió n'Asturies nos últimos tres años casi 50 millones d'euros, según apuntó Molina.

De la mesma manera, señaló que va firmar un alcuerdu coles fundaciones de la Llaboral (Xixón) y Óscar Niemeyer (Avilés) pa collaborar nes actuaciones y eventos que s'entamen. "Siguimos trabayando no que ya se fizo y proponiendo nueves coses porque la cultura ye un mediu pa una comunidá como Asturies p'atrayer turismu", dixo.

Xunto a Molina ficieron la visita al Muséu Arqueolóxicu el presidente del Principáu d'Asturies, Vicente Álvarez Areces; la cosneyera de Cultura y Turismu, Encarna Rodríguez, y l'alcalde d'Uviéu, Gabino de Lorenzo, ente otros políticos autonómicos. El ministru tamién asiste güei a la inauguración del Teatru de la Universidá Llaboral de Xixón.

Areces conicidió n'estimar que les obres del muséu van tar finalizaes "prácticamente nel primer trimestre del añu próximu". De la mesma manera, agradeció'l "compromisu" del responsable de Cultura con Asturies que permite a les Alministraciones Públiques "tar mui arguyoses" d'entamar les inversiones "más importantes que recibiera la Comunidá en materia cultural en tol periodu democráticu".