Modifíquense cuatro topónimos de Cabranes a pidimientu del Conceyu

|
Casa Conceyu de Cabranes

La Cruciada, La Bobia, Miyangues y La Miyar pasen a ser la denominación oficial d’estos cuatro llugares de Cabranes. La Xunta Asesora de Toponimia dio’l preste a estes cuatro modificaciones solicitaes pol Conceyu que s'espublizaron nel BOPA d’esti xueves.

Aprobaos n’avientu del 2005, once años depués el Conceyu de Cabranes solicitó la revisión de cuatro topónimos tradicionales, que pasaben a ser oficiales. Tres estudiar estos pidimientos, la Xunta Asesora de Toponimia comunicó al Ayuntamientu la so conformidá, polo qu’agora estos nomes de llugar pasen a ser los definitivos tres salir espublizáu nel Boletín Oficial del Principáu d’Asturies la modificación del decretu previo preste del Conseyu de Gobiernu.

‘La Encrucijada’ yera la denominación castellanizada de La Cruciada, que naquel momentu adaptóse como ‘La Curciada’. Lo mesmo asocede con ‘Miyangües’, que nel 2005 camudó a ‘Miangues’ y agora pasa ser definitivamente Miyangues.

Nel casu de La Bobia, llugar de Fresnéu que nun taba recoyíu, camúdase la ‘v’ primera de ‘La Bovia’ por una ‘b’. Tampoco nun apaecía ‘La Miyer’, en Torazu, que tien agora la denominación oficial de La Miyar.

Semeya de la FACC baxo llicencia CC BY-SA 3.0.

Contador Estadistiques