La bona recepción de los temes n’asturianu a nivel estatal y el compromisu de Misiva na dignificación del idioma, lleva a los de Grau a editar el so últimu trabayu, ‘En pie de xera’, namái en llingua asturiana. Esti sábadu va presentalu n’Uviéu en conciertu.
Dende la maqueta ‘Misiva’, asoleyada nel 2009, el grupu moscón de punk-rock evolucionó enforma nel so estilu y contundencia, lo que se ve reflexáu nesti ‘En pie de xera’. Doce cantares editaos namái en llingua asturiana que yá se pueden sentir y descargar na rede, una apuesta de la banda pol idioma tres comenzar la so carrera con discos billingües nel que los mesmos temes sonaben tanto n’asturianu como en castellanu.
‘En pie de xera’ grabóse nel OVNI Estudio, asitiáu en Bonielles, baxo la producción de Pablo Martínez Pérez (Desakato), y foi masterizáu nos Mamia Mastering d'Altsasu. El diseñu del discu, mentes, correspuende a Rubén Fernández González y La Bella Solera.
Pese a que yá pudieron sentise temes del discu’l sábadu pasáu en Palencia nun conciertu conxuntu con Mala Reputación, la presentación oficial del mesmu va tener llugar el sábadu na Lata de Zinc. Va ser a les 22 hores nuna cita que va tener como grupu convidáu a los madrilanos Never Draw Back, con entraes a 7 euros anticipada y a 10, na puerta.
Semeya obra de Jaime Alonso Sánchez.
Adxuntu | Tamañu |
---|---|
![]() | 63.9 KB |
![]() | 378.92 KB |