Misiva actúa en Xixón xunto colos navarros Lendakaris Muertos

La discoteca Otto acueye esti sábadu un conciertu de Misiva, grupu de punk-rock en llingua asturiana y castellana. Los moscones van compartir escenariu con Lendakaris Muertos, una de les bandes más populares de la escena estatal.

Los primeros en salir al escenariu, a les 23 hores, van ser Misiva, que tán acabantes de grabar un discu de versiones acústiques en llingua asturiana colos cantares ‘Rapaz refalfiáu’ (‘21st century boy’, de Bad Religion) y ‘Cartón (‘Linoleum’, de NOFX), amás de trés temes del discu ‘Parte de la solución’. Na Otto podrán sentise cantares d’estos dos trabayos y del so primer discu ‘Misiva’ na so potencia máxima.

Tres la banda de Grau va tomar el relevu Lendakaris Muertos, cuartetu que torna a Xixón pa presentar el so trabayu últimu: ‘Cruzificados por el antisistema’. Cantares rápidos y lletres sarcástisques enllenes d’humor son la carta de presentación de los navarros, que nun dexen a naide indiferentes con temes como ‘Simpatía por el de Bildu’, ‘La hoz y el martini’, ‘Gora España’, ‘Centro comercial’, ‘Veteranos de la kale borroka’, ‘Héroes de la clase obrera’ o ‘Se habla español’, ente munchos otros. El preciu de la entrada pa esti conciertu ye de 12 euros, anticipada, y de 15 na puerta.