Mirandés: 20 años de reconocimientu

|
Mirandés: 20 años de reconocimientu

En setiembre del 1998 presentábase en Lisboa, na Assembleia da República, el documentu que solicitaba’l reconocimientu de los derechos llingüísticos de la comunidá mirandesa. Sería en payares cuando s’aprobaría y en xineru entraría en vigor la norma que pon al mirandés al mesmu nivel que’l portugués nel so territoriu.

La propuesta presentada hai agora venti años, en concreto’l 17 de setiembre, convertiríase na Llei númberu 7/99, del 29 de xineru del 1999 de la República Portuguesa. Ésta pasaría’l trámite del Parllamentu, meses enentes, el 19 de payares del 1998, polo que’l Gobiernu reconocía a esta variante del asturlleonés falada en Portugal.

La norma, en concreto afita la promoción d’esta llingua como “patrimoniu cultural, instrumentu de comunicación y refuerciu d’identidá de la tierra de Miranda”, reconoz el derechu a deprendela y formar profesores de la mesma, y da permisu a les autoridaes de Miranda de l Douro a emitir los documentos con una versión en mirandés. Los cerca de 15.000 falantes d’esta llingua vieron asina reconocíos los sos derechos y l’idioma garró puxu gracies a la creación d’instituciones como l’Anstituto de la Lhéngua Mirandesa un añu depués.

Semeya: El grupu Mirandanças na Fiesta de la Oficialidá de Bimenes 2017.

Contador Estadistiques