Milio Mariño espubliza’l llibru de rellatos ‘El xaretón del embeligru’

L’escritor avilesín Milio Mariño ta acabante d’espublizar con Suburbia Ediciones un llibru de rellatos que lleva’l nome de ‘El xaretón del embeligru’. En total son trece histories en llingua asturiana con muncha retranca y humor.

“‘El Xaretón del embeligru’ ye un llibru que presta lleer. Un llibru que prinda dende l'entamu y nos fai esfrutar a mamplén”, espliquen dende la editorial, que pon a la venta la obra a un preciu de 12 euros. “Son trece rellatos, escritos nun asturianu cenciello y candial, nos que l'autor, con retranca y mui bon humor, apurre una güeyada particular de la vida de cutiu y de les chifladures que nos aforfuguen y non mos atrevemos a dexales salir por aquello de que nun vayan pensar que, daveres, tamos chiflaos”, añaden. La pintura qu’ilustra la cubierta del llibru ye obra del autor andaluz José Arjonilla.

Columnista habitual nel diariu ‘La Nueva España’ y collaborador na primer dómina del selmanariu ‘Les Noticies’, Mariño ye tamién autor del llibru ‘Esconderites’, tornáu y espublizáu en castellanu. Na so trayautoria consiguió’l Premiu de Narraciones Fantástiques, el Premiu Rellatos de la Mar, el Premiu IV Selmana Internacional del Humor, el Premiu al Meyor Pregón de les Fiestes d’El Bollu, el Premiu Los Bilordios de Pinón y el Premiu de Narraciones Piloña.