Miles d'avilesinos xinten na cai pa celebrar les fiestes d'El Bollu

|
Xinta na Cai Avilés 2018

Un total de 14.430 persones apuntáronse pa la XXVI Xinta na Cai con motivu de les fiestes d'El Bollu d’Avilés. Dende les 14 hores d’esti llunes ocupen les meses instalaes nes cais y places del centru históricu de la villa nuna xornada respetada pol agua.

Les cais cercanes a les places del Carbayedo, d’Hermanos Orbón, de Carlos Lobo y del  Carbayo (Sabugo) tán nestos momentos enllenes de xente disfrutando d’una xinta na cai amenizada pola animación de les charangues. Mentes, los más mozos acuden al parque de Ferrera nuna celebración alternativa a la de la yá tradicional por El Bollu.

Nes meses instalaes pol Conceyu tán apuntaes 14.340 persones, que pese a la inestabilidá meteorolóxica tán pudiendo disfrutar de la Xinta na Cai. La folixa va siguir pela tarde col II Desfile de Carroces (18 hores, con salida en José Cueto y final na avenida de Cervantes); el conciertu folk d’Eliseo Parra y Dobra, proyeutu musical nuevu de Xuacu Amieva (19 hores, El Parche); y el XXVII Alcuentru Coral d’Habaneres (20 hores, Auditoriu de la Casa Cultura).

El ‘Bollomochu’ del 2017

Esta edición de la Xinta na Cai ye la primera tres la denuncia pública fecha por Somos Avilés pol falsu récor Guinness del añu pasáu, que s’anunció en 11.836 comensales. La candidatura de xunidá popular contautó cola empresa qu’edita’l conocíu llibru de récores, que-y treslladó nun tener constancia del mesmu y que’l que recueye na so espublización ye’l del mayor númberu de raciones d’un mesmu productu, non el de mayor númberu de persones comiendo na cai.

Según esplicó a primeros de marzu Somos Avilés, el Conceyu contrató a una empresa pa xestionar esti rexistru, a la que pagó 4.000 euros. Ésta encargóse de contabilizar a los participantes na Xinta na Cai, pero nun foi supervisáu pol Guinness World Records como anunció l’equipu de gobiernu municipal, fechu desatapáu por esta formación mui comentáu n’Avilés y que xeneró numberoses crítiques al PSOE dende la oposición.

Contador Estadistiques