Miguel Rojo presenta'l poemariu “llaberintos”

L'escritor Miguel Rojo presenta esta tarde'l so poemariu nuevu "llaberintos" qu'edita la casa Trabe. Ello va ser nel Club Prensa Asturiana de la Cai Calvo Sotelo d'Uviéu nun actu que va entamar a les 7 y media de la tarde.

Nacíu en Zarracín, Tinéu, nel añu 1957, Miguel Rojo ye amás de Doctor en Bioloxía y profesor d'institutu, ún de los escritores n'asturianu más activos dende l'entamu del surdimientu. La so consagración llegó nel añu 1988 cuando algamó'l Premiu Xosefa Xovellanos cola novela Asina somos nós. Tres d'esta novela vieno "Tienes una tristura nos güeyos que me fai mal" (1989) atractivu conxuntu de relatos qu'algamó gran popularidá nel so día que namás superó la so siguiente obra "Hestories d'un seductor (Memories d'un babayu)" obra caltriada d'ironía cola que ganó la primer edición del Premiu de Narraciones Trabe nel añu 1993 y que se convertió nun auténticu "best-seller" de la lliteratura asturiana y ún de los más solicitaos polos llectores más mozos.

Amás de rellatos infantiles como " Telva y los osos" Rojo diose a conocer como poeta ganando nel añu 1996 el Premiu Fernán Coronas col so llibru "Buscador d'estrel.las" entamando una xera poética que siguió nel llibru "Bilbao: estación terminal" nel 2001 y agora cola obra que se presenta esta tarde.