Miguel Rojo lleva’l VII Premiu Timón p’autores en llingua asturiana

Na tarde del miércoles fallóse’l VII Premiu Timón p’autores en llingua asturiana y eonaviego. Nesta edición, el gallardón foi pal escritor tinetense Miguel Rojo, que va recibir una obra del escultor Jesús Castañón mientres la Vagamar 2013.

El xuráu conformáu por Xurde Morán, Roberto González-Quevedo, Antón García, Aurora García Rivas y Humberto Gonzali decidió que’l de Zarracín, autor de la novela ‘Histories d'un seductor. Memories d'un babayu’, ún de los llibros más vendíos na historia de la lliteratura asturiana, yera merecedor d’esti gallardón que premia una trayeutoria. Nesta edición del Timón, la sétima, optaben aquellos escritores nacíos nel añu 1963 o en feches anteriores. Los otros aspirantes yeren Lurdes Álvarez, Pablo Ardisana, Manuel Asur, Sabel de Fausta, Esther Prieto, Miguel Solís Santos, Xosé Bolado, Milio Rodríguez Cueto, Adolfo Camilo Díaz, Ignaciu Llope, Ismael González Arias, Taresa Lorences, Lluis Xabel Álvarez, Esther García López, Alberto Cobreros Gil, Cristina Muñiz Martín, Esther Prieto, Ismael María González Arias, Francisco Xavier Frías Conde, Sabel de Fausta y Ánxel Álvarez Llano.

Doctor en Bioloxía y profesor d'institutu, Rojo (Zarracín, 1957) cuenta con un Premiu Xosefa Xovellanos gracies a ‘Asina somos nós’ (1989), amás de dos ediciones del Premiu de la Crítica d'Asturies en Poesía y Lliteratura Infantil, nos años 2005 y 2008, con ‘Llaberintos’ y ‘El viaje de Tin y Ton’, de manera respeutiva. Tamién ye bien conocía la so historia ‘Xicu’l topeiro’, de la que Gonzalo Tapia fixo un curtiumetraxe. Autor del Surdimientu, escribió tanto n’asturianu como en castellanu en casi tolos xéneros.

El tinetense sucede nel palmarés del Premiu Timón p’autores en llingua asturiana y enoaviego a Antón García. Enantes recibieren esti prestixosu gallardón qu’entama l’Asociación Cultural L’Arribada Nené Losada Rico (2007),  Xuan Xosé Sánchez Vicente (2008),  Manuel García ‘El Galano’ (2009), Roberto González-Quevedo (2010) y Vicente García Oliva (2011). La entrega d’esti premiu, consistente nuna obra del escultor y ceramista xixonés Jesús Castañón, va tener llugar mientres un actu previstu en la Vagamar 2013, actividá setembrina de L’Arribada, que tamién concede un Timón en llingua castellana y otru, per primer vez esti añu, de Cultura Asturiana.