Migoya diz que Valledor tuvo una reacción "ilóxica" y "desproporcionada" na Xunta'l Principáu

La conseyera d'Alministración Pública y vocera del Gobiernu, Ana Rosa Migoya, declaró que'l diputáu d'Izquierda Xunida-Bloque por Asturies-Los Verdes, Francisco Javier García Valledor, tuvo'l pasáu martes una reacción "ilóxica" y "desproporcionada" al abandonar la comisión presupuestaria d'Educación mientres intervenía'l conseyeru d'educación José Luis Iglesias Riopedre.

Valledor abandonare la sesión de la Comisión d'Economía de la Xunta Xeneral del Principáu en señal de protesta polo que consideró una falta de respetu al Parlamentu del conseyeru d'Educación, José Luis Iglesias Riopedre, qu'intervinía nesi momentu. A entrugues de los periodistes, na rueda prensa posterior al Conseyu de Gobiernu d'ayeri martes, Migoya esplicó que penriba de les diferencies que puean surdir ente l'Exucutivu y la oposición, los diputaos han caltener siempre una "cortesía parlamentaria".

Migoya, que tamién ye diputada na Xunta, dixo que Riopedre namás fexo que defender de manera "cortés" y "conveniente" el proyectu presupuestariu del Gobiernu, dalgo que nun xustifica l'actitú de Valledor.

"Pienso qu'estos comportamientos respuenden más a actitúes personales énte la vida", añadió Migoya. En tou casu, y a pesar de la situación, dixo que'l proyectu de presupuestos sigue "abiertu al diálogu" na negociación parlamentaria. Migoya esplicó que na primer selmana de comparecencies de los miembros del Gobiernu, l'Executivu detectó que, amás de "pequeñes diferencies", nun apaecieron tovía razones de pesu que xustifiquen una refuga dafechu al presupuestu.