Migoya diz que nun se va negociar la reforma l'estatutu per separao con IX-BA

El Gobiernu asturianu nun va camudar el procedimientu qu'ha siguise pa la reforma del estatutu y nun va negocialu colos sos socios de gobiernu d'IX-BA per separao enantes de llevar el documentu base a la Xunta Xeneral. Ana Rosa Migoya, en calidá de portavoz del gobiernu asturianu, dexó claro ayeri con esta esplicación que la propuesta que fixere Jesús Iglesias, secretariu xeneral d'Izquierda Xunida, pa que los dos socios de Gobiernu negociaren la reforma estatutaria nun prendió nes files socialistes.

Ana Rosa Migoya, que compareció ayeri pa dar anuncia de los alcuerdos del Conseyu de Gobiernu repitió les declaraciones d'Areces d'esta mesma selmana cunado declarare que les comisiones d'espertos encargaes de facer los estudios previos a la reforma yá tan cásique terminaes y que, n'entregando estes tolos sos informes, el Gobiernu va facer un documentu base pal que va solicitar les opiniones de los partíos con representación cameral col oxetivu de que sía lo más representativu posible de toles opiniones polítiques. En terminándose esti documentu base va ser cuando se debata la reforma estatutaria de manera definitiva, un procesu que va facese nel marcu de la Xunta Xeneral del Principáu, onde, según remembró Ana Rosa Migoya "cada grupu parlamentariu tien tres d'elli la so respectiva fuerza política".