Migoya acepta los cambios y Palacios fala de "llaváu de cara" del Gobiernu

El presidente español dio a conocer en rueda prensa la nueva composición del Gobiernu, tres la remodelación desendolcada. Nel executivu asturianu recibióse con normalidá, pesie a nun tar Areces, y el Bloque calificólo de “llaváu de cara”.

Colos cambios, les persones y los sos cargos qu’entren nel Gobiernu son Leire Pajín, ministra de Sanidá y Igualdá;  Ramón Jáuregui, ministru de Presidencia; Rosa Aguilar, ministra de Mediu Ambiente, Mediu Rural y Marín; y Valeriano Gómez, ministru de Trabayu y Inmigración.

D’otra miente, salen del Executivu María Teresa Fernández de la Vega (ex vicepresidenta primer, ministra de Presidencia y vocera); Miguel Angel Moratinos (ex ministru d'Asuntos Esteriores); Bibiana Aído (ex ministra d'Igualdá); Celestino Corbacho (ex ministru de Trabayu y Inmigración); Beatriz Corredor (ex ministra de Vivienda) y Elena Espinosa (ex ministra de Mediu Ambiente, Mediu Rural y Marín).

Otru de los cambios ye la entrada d’Alfredo Pérez Rubalcaba como vicepresidente primeru, ministru d'Interior y voceru; el cambiu de la cartera de Trinidad Jiménez (ex ministra de Sanidá); la fusión del ministeriu de Vivienda con Fomentu, dirixíu por José Blanco; y la desaparición del ministeriu d’Igualdá de Bibiana Aído.

Areces nun ye ministru
Pesie a les especulaciones, el Presidente asturianu, Vicente Álvarez Areces, nun foi nomáu pa nengún ministeriu. El posicionamientu del exetivu asturianu, en palabres de la conseyera d’Alministraciones Públiques y Portavoz del Gobiernu, Ana Rosa Migoya, foi d’esperar que’l gobiernu central siga comprometíu cola solución de los problemes derivaos de la crisis y que siga “dando la mano” a les comunidaes autónomes.

"Siempre nos sentimos arropaos polos gobiernos presidíos por José Luis Rodríguez Zapatero, y creemos que les persones designaes van siguir nesi camín de collaboración", manifestó Migoya.

Tampoco cree Migoya que sía importante qu'haya o non ministros asturianos nel Conseyu de Ministros. "Esi ye un alderique bien recurrente nesta comunidá, pero quedó demostráu que'l compromisu coles prioridaes d'Asturies caltuviéronlo persones independientemente que nacieren o non nesta tierra", manifestó.

La conseyera atribuyó a especulaciones periodístiques" y a "quinieles" los rumores qu'apuntaben al presidente del Principáu, el socialista Vicente Álvarez Areces, como unu de los posibles ministros. Asina, esplicó qu'el mesmu Areces vieno manifestando qu'el so deséu ye terminar la llexislatura.

"Llaváu de cara"
Per otru llau, parte de la izquierda nacionalista tamién se posicionó. Preguntáu en rueda de prensa sobre la remodelación, el voceru del Bloque por Asturies, Rafael Palacios, dixo que’l nomamientu de Trinidad Jiménez como ministra d'Esteriores, y de Leire Pajín como ministra de Salú ue "una patada por elevación pa quitales del mediu".

Criticó tamién la eliminación del Ministeriu d'Igualdá y considera que l'oxetivu últimu de la midida ye "llavar la cara al Gobiernu" y reforzar la figura de Rubalcaba. Asina lo señaló nuna rueda de prensa p'anunciar la presentación d'una moción que pide la creación de la especialidá docente de Llingua Asturiana.
  
El voceru del bloque considera que'l nomamientu de los dos ministres ye una midida de Zapatero pa quitales del mediu polos sos fracasos", tres la derrota de Jiménez nes primaries madrilanes, a la que sofitara la mesma Pajín dende la Secretaría d'Organización del Partíu. Nel casu de Jiménez, señaló que se-y da'l Ministeriu d'Esteriores pa que "tea fuera'l mayor tiempu posible".
  
Ámás, Palacios criticó duramente la eliminación del Ministeriu d'Igualdá de Bibiana Aído, "ante les presiones de la estrema derecha", cuestión que-y esmolez.