Mieres va remocicar el Mercáu d’Abastos

L'históricu edificiu ye ún de los mercaos más antiguos que se conserven n'Asturies. La restauración quier dexar el mercáu nun estáu lo más asemeyáu al orixinal cuando s'inauguró nel añu 1907.

Cuando l'arquitectu Juan Miguel de la Guardia diseñó nel añu de 1907 les llinies mayestres del mercáu d'abastos de Mieres tuvo en mente l'exemplu del Mercáu de Les Halles de París, casu paradigmáticu de l'arquitectura del fierro y el cristal n'Europa apliacada a places d'abastos y cumal de la obra del arquitectu Víctor Baltard. Llevntaes nel añu1853 y derribaes en 1971, Les Halles parisines dexaron bien de fíos y imitadores per toa Europa que-yos sobrevivieron. El so exemplu ye pol que va mandase tamién agora la recuperación del emblemáticu edificiu agora que va camín del so centenariu, sigún s'anuncia dende'l Conceyu de Mieres, que dio de pasu la contratación de les obres de remocique del edificiu na so primer fase por importe de más de 747.000 euros. N'aprobándose la meyor d'ente les ufiertes que se reciba, el mercáu va recibir meyores nel refuerzu de la estructura esterior, la cubierta y la carga de les fachaes, amás de llabores de carpintería y cristaleríes, retirando la cubierta que tien agora de planches d'uralita hasta dexar l'edificiu lo más asemeyáu posible a la so traza orixinal, muncho más soleyera y tresparente. El coste total de les obres va andar per 1,2 millones d'euros que van cubrir ente la Conseyería d'Industria y el Conceyu, y pártese de la idega de que la obra ha llevase alantre torgando lo menos posible'l llabor de los comerciantes.