Mieres va andar de Folixa esti fin de selmana

Tres díes de música, cultura y fiesta son l'apueste del conceyu de Mieres pa esta Folixa na Primavera

La Folixa na Primavera ye una iniciativa del Conceyu de Mieres qu'adulces va garrando fama per toa Asturies. Énte la bona rempuesta del públicu n'años anteriores la conceyalía de festexos de Mieres decidió puyar por esti festeyu, como demuestra que'l presupuestu d'esti añu llegue a los 90.500 euros.

Esti presupuestu permite trayer hasta Mieres a grupos de renome internacional nel mundu del folk, amás de la representación asturiana que nun puede faltar. El vienres 23 vamos poder ver a "Skolvan", el grupu bretón que ye xunta otres bandes representante de la fola de músicos que renovaron el folk bretón. Los bretones van entamar a tocar a eso de les 23:00 hores, y darréu d'ellos llega la música gallega de Mercedes Peón. La cantante que dende la tradicional vocal gallega interpreta con fuerza y personalidá un repertoriu de cantares gallegos tradicionales y compuestos, va pesllar los actos del vienres.

Pal sábadu tenemos música que sal del nueso país de la mano de "Llangres", conocíos de sobra polos aficionaos asturianos a la música folk, y que van tener nesti conciertu una bona oportunidá pa enseñar de lo que son capaces. Dempués de los llangreanos, sobre la una, va tocar un nome que nun ye nuevo per estes tierres, el gaiteru irlandés John McSherry ún de los meyores gaiteros del mundu que va presentar en Mieres acompañáu pola so banda "At first light", el so últimu discu.

Mieres tienlo too preparao pa entamar dende esta mesma nueche la que yá ye la novena edición de la Folixa na Primavera. Con un presupuestu de 90.500 euros (más de 15 millones de pesetes) la Folixa promete siempre dos bones nueches de música folk y apurre sidra a embute, tanto como 7.000 llitros, que son los que van repartise esti añu. Pa bebelo, el conceyu va repartir tamién 5.000 vasos col emblema de la folixa. Baille de tradicional, xuegos asturianos pa los neños y menos neños y una riestra bien llarga d'actividaes pa nun perder esti fin de selmana en Mieres.