Mieres va acoyer la III Sestaferia del Profesoráu de Llingua Asturiana

‘Trabayando la oralidá nes clases de Llingua Asturiana’ ye’l títulu de la III Sestaferia del Profesoráu de Llingua Asturiana que va celebrase esti vienres. El llugar escoyíu ye’l IES Bernaldo de Quirós, de Mieres.
 
Esta xornada va axuntar a 110 profesores de les materies Llingua Asturiana y Gallego-Asturianu de Primaria y Secundaria cola intención “de rellacionar l’aprendimientu de la llingua oral coles competencies básiques que recueye’l currículum y diseñar actividaes centraes nos conteníos orales”, apunta nuna nota de prensa la Conseyería d’Educación y Ciencia, qu’entama l’actu al traviés del Centru del Profesoráu y de Recursos Nalón-Caudal. Marta Mori, profesora y escritora que ta acabante d’asoleyar ‘La mio voz’, obra ganadora del Premiu Xuan María Acebal 2010 de poesía, va ser la encargada d’abrir la xornada a les 10.15 hores cola ponencia ‘La llingua oral na clas d’asturianu’.
 
Tres un descansu, los docentes van poder participar en seis talleres dirixíos al trabayu de la oralidá en clase d’asturianu. Éstos lleven el títulu de ‘Llingua oral nes clases d’eo-naviego’, importíu por José María Quintanilla; ‘Esperiencies de radio escolar’, por Chechu García; ‘Teatru, dramatización y llingua’, por Maxi Rodríguez; ‘Oralidá y competencies básiques’, por Paula Díaz y María González; ‘Doblaxe de películes’, por Alberto Rodríguez; y ‘Usu didácticu del Atlas sonoru de la llingua asturiana’, por Mercedes Ruisánchez. Pa que los profesores nun pierdan nengún de los talleres, éstos van repetise pela tarde a partir de les 16 hores.
 
La presentación del llibru ‘Nomes d’Asturies’, a les 17.45 hores, va preceder al actu final d’esta III Sestaferia del Profesoráu de Llingua Asturiana: un conciertu d’Alfredo González.