Mieres, puntu de rocea ente la FSA y IX

El conceyu de Mieres ta faciendo estos díes de termómetru de la salú del pautu de gobiernu n'Asturies. La tensión ente les dos fuerces polítiques, que lleva llevantando sarapicos cuasimente dende l'entamu de la llexislatura, tien agora otru puntu de posible francedura en Mieres. Anque la crisis de Mieres paecía que taba trancada dempués d'esti fin de selmana, les últimes declaraciones d'IX nun sentaron gota bien na FSA. El secretariu de los socialistes asturianos, Javier Fernández, pidió-y a IX que "meta en vereda" a los sos representantes de Mieres.

Ello ye que los responsables d'IX de Mieres dieron ayeri por seguro que los socialistes de la villa nun diben repetir con José María García, l'alcalde actual, como candidatu nes próximes elecciones. D'otra manera, IX de Mieres va volver a llevar a plenu'l proyectu pa la creación d'un hospital de parapléxicos en Mieres, una de les reivindicaciones poles que más s'enraxonó'l discutiniu ente les dos fuerces que gobernaben Mieres en coalición hasta que s'enfrentaren en xunu por causa del llugar au tenía d'asitiase'l nuevu hospital de la zona. La privatización del serviciu de llimpieza o la idega d'IX de llevar a Mieres la sede del Procurador Xeneral d'Asturies foron otros de los elementos d'una rocea que vivió otru puntu tensu enforma cola moción de confianza a cuenta de los presupuestos del conceyu que perdió l'alcalde'l pasáu xueves.

Anque dende la FSA llegó a dicise'l vienres que'l pautu de Gobiernu taba mancáu de muerte, tanto'l presidente asturianu Álvarez Areces como la mesma IX aselaron el discursu afirmando Areces que'l casu de Mieres nun yera causa pa francer l'alcuerdu de gobiernu n'Asturies y IX que tres de la crisis taba un sector mui concretu de la FSA y del SOMA interesáu en francer l'alcuerdu de gobiernu. El llunes un alcuerdu ente les partes trancaba la crisis qu'amenaza con volver.